Валюта на вучобу за мяжой — не праблема, але з ЕГУ могуць узнікнуць пытанні

110801 Rugain Valuta.mp3

Кіраўнік Беларусі на сустрэчы з новай старшынёй Нацбанка Надзеяй Ермаковай закрануў пытанне продажу валюты на аплату замежнай адукацыі.

"Мы дамаўляліся аб тым, што Ашчадны банк, цяпер ужо і іншыя, гэтую функцыю на сябе бяруць, забяспечаць продаж валюты насельніцтву пад неабходныя патрэбы: хвароба, вучоба. І тое — вучоба з якой мэтай, у інтарэсах дзяржавы або для папаўнення пятай калоны, як у нас некаторыя вучацца за мяжой. Гэта дзяржаўная паслуга, і яна павінна аказвацца ў інтарэсах дзяржавы".

У гэтым многія пачулі забарону на продаж валюты для студэнтаў беларускага універсітэта ў Вільні — ЕГУ, які раней працаваў у Мінску, але быў закрыты і вымушаны пераехаць за мяжу.

У "Беларусбанку" Еўрарадыё запэўнілі, што валюту без чаргі прададуць на аплату адукацыі ў любой краіне і ў любым універсітэце. Для гэтага патрэбная копія дамовы з навучальнай установай, даведка з коштам аплаты і даведка аб тым, што з'яўляешся студэнтам.

"За навучанне мы пералічваем безнаяўным шляхам, — распавядаюць у банку. — Гэта каштуе 14 долараў плюс 19500 рублёў за складанне плацежнага даручэння. На пражыванне даем наяўнымі. Вы прыходзіце, пішаце заяву, прад'яўляеце неабходныя дакументы, і на працягу 4-5 дзён вам даюць адказ. На адукацыю пытанні вырашаюцца станоўча, бо ёсць палажэнне, што грошы трэба даваць толькі на вучобу і лячэнне за мяжой".

Таму ў якой бы краіне ні навучаўся студэнт, валюту на аплату вучобы купіць зможа, запэўніваюць у банку. Праўда, “калі гэта ЕГУ, то могуць узнікнуць пытанні”, выказала ўласнае меркаванне суразмоўца Еўрарадыё.

Праверыць гэта можна толькі вопытным шляхам, бо канкрэтных крытэрыяў няма. Пакуль былі толькі адзінкавыя адмовы, з прычыны адсутнасці неабходных дакументаў. Дарэчы, па валюту на лячэнне і вучобу ў "Беларусбанк" ужо звярнуліся больш за 5 тысяч чалавек, якім банк прадаў 4,5 мільёны долараў.

Цяпер такую магчымасць маюць яшчэ 4 банкі. Так, у “Альфа-банку” адказ даюць на працягу 30 банкаўскіх дзён, там, як і ў іншых, яшчэ толькі пачалі прымаць заявы.

У ЕГУ аплату па некаторых спецыяльнасцях сёлета зноў павысілі. Адны праграмы каштуюць 600 еўра за год, як і раней, а больш папулярныя — 750. Але студэнтам з улікам беларускай сітуацыі далі магчымасць адтэрміновак і растэрміновак аплаты.

"ЕГУ у сваю чаргу спрабуе дапамагчы з вырашэннем гэтага пытання, і мы прапанавалі такую схему: студэнты атрымалі магчымасць плаціць не ўсю суму адразу, а разбіць яе на некалькі этапаў", — распавяла прэс-сакратар ЕГУ Таццяна Рудзінскене.

Цяпер аплаціць можна адным плацяжом за семестр ці выплачваць часткамі на працягу 5 месяцаў. Тыя, хто мае цяжкасці, могуць разлічваць на адтэрміноўку аплаты на семестр. Пакуль невядома, ці шмат студэнтаў скарысталіся магчымасцю набыць валюту, але апошні часам многія просяць даведкі аб сярэднім пражытковым мінімуме ў Літве.

• аудио
• текст