У Мінску ўшанавалі паўстанцаў Каліноўскага (фота)
Акцыя ў памяць пра паўстанне 1863 года прайшла пад бела-чырвона-белым сцягам.
Увечары 22 студзеня ля касцёла Святога Язэпа (ён на сённяшні дзень з’яўляецца архівам) прайшла малітоўная акцыя, прысвечаная гадавіне паўстання Кастуся Каліноўскага.
Вядома, што пасля падаўлення паўстання кляштар быў прыстасаваны пад турэмныя памяшканні — менавіта там утрымоўвалася ўдзельніца паўстання Каміла Дунін-Марцінкевіч, дачка славутага пісьменніка Вінцэнта Дуніна-Марцінкевіча.
Удзельнікі акцыі запалілі знічы ў памяць пра паўстанцаў і манахаў кляштара, рэпрэсаваных за падтрымку паўстання. Таксама грамадскія актывісты зладзілі супольную малітву за паўстанцаў і сучасных палітвязняў ды праспявалі беларускія нацыянальныя гімны “Магутны Божа” і “Мы выйдзем шчыльнымі радамі”.