У Брэсце раскалоўся 12-павярховы дом (фота)
Жыхары лічаць, што прычынай стала аптэка, якую насуперак іх волі прыбудавалі знізу.
Касымі расколінамі ад 12-га да першага паверху пайшла паўночная нясучая сцяна дома па Набярэжнай Францыска Скарыны, 32. Расколіны з'явіліся між вокнаў знутры кватэр і звонку. Жыхарка дома Ірына Леванюк тлумачыць:
Леванюк: "У нас ніколі звонку нашага дома не было касых расколін. Дом абліцаваны пліткай, і яна патрэскалася ад першага паверху да апошняга. Гэта сведчанне таго, што адна калона дэфармавалася. Мабыць, пагрузілася ў зямлю. Унутры, у кватэрах, жыхары бачаць расколіны паміж плітамі і за батарэямі ацяплення".
Пліты перакрыцця месцамі раскалоліся нават разам з наклеенай аздобай і сумежнай сцяной. У кватэры № 9 вільготная і чорная ад цвілі сцяна. Унутры яе трэснула і псуе ваду труба.
40-гадовы дом стаіць на двух калонах. У 2005 годзе яго ўжо прызнавалі аварыйным і ўмацоўвалі падмурак.
Аптэку сеткі “Лінія жыцця” пачалі будаваць у міжкалоннай прасторы летась. 90 жыхароў дома падпісаліся супраць будоўлі. Яе прыпыніў суд, але потым вынес рашэнне не на карысць жыхароў.
