Цепласеткі: “Гарачая вада ў трубах астывае... два дні”

З 10 траўня адключылі гарачую ваду ў раёне Мінска, вядомым як "Розачка". Еўрарадыё накіравалася туды, каб паглядзець, ці можна ўбачыць тую працу, і патрапіла... на першы прарыў трубы.

120514 Rugajn Voda.mp3

"На 2 тыдні адключылі. Перыядычна адключаюць, каб рамантаваць. А дзе яны, што рамантуюць — не ведаем. Трэба ў домакіраўніцтва зайсці", — расчароўваюць бабулі, якія сядзяць на лавачцы ў двары дома на Волаха.

На ўваходзе ў ЖЭУ сустракаю дырэктара. Ён акурат толькі даведаўся пра першую аварыю. Таму бяжым хутчэй па названым адрасе.

"Цеплавыя сеткі праводзілі апрасоўку (выпрабаванні на трываласць трубаправода). Прарвала трубу, затапіла камеру, з камеры пайшла вада ў падвал", — распавядае супрацоўнік аварыйнай, якая акурат адпампоўвае ваду з падвала аднаго дамоў на вуліцы Каржа.

Карціна тут — як пад час залевы, толькі сонца свеціць. Вады налілося шмат. Праз двары цячэ цэлая рака, каб прайсці да пад'ездаў, трэба добра паскакаць, не замачыць ногі не атрымоўваецца. Жанчына з дзіцём абураецца: "Гэта вашы праблемы, што вам ваду трэба адпампоўваць".

Як праводзяць выпрабаванні цеплатрасы, Еўрарадыё тлумачаць у Мінскіх цеплавых сетках: каля двух дзён вада ў трубах астывае, потым пачынаюць павышаць ціск, там, дзе прарывае, рамантуюць.

"Учора дзень быў затрачаны на расхалоджванне сетак. Мы пачынаем праводзіць выпрабаванне, калі тэмпература ніжэй за 40 градусаў", — тлумачыць галоўны інжынер прадпрыемства "Мінскія цеплавыя сеткі" Аляксандр Драгун.

Выпрабаванні праводзяць на ўсіх вуліцах, дзе адключылі ваду, па чарзе. Па чарзе потым і рамантуюць. Але ж адключаюць адразу раён, па прыналежнасці да ЦЭЦ. Пры гэтым прызнаюцца, што ў гэтым месцы сталіцы прарывы здараюцца не часта.

"Тут на раёне рэдка. Трубы добрыя. Там, дзе добрыя трубы, там не здараецца, а дзе дрэнныя, такія разрывы і бываюць".

Але пасля разрыву трубы не заўсёды мяняюць на новыя. Толькі калі немагчыма аднавіць, а звычайна латаюць дзіркі. Гэта пры тым, што мінскім трубам — 30 гадоў!

"Знаходзяць паломку, раскопваюць, калі пад зямлёй, і заварваюць. Ці калі трубу нельга аднавіць, яе мяняюць — выражуць і паставяць новую. Канкрэтна гэта зробіцца максімум за два (!) дні".

Незразумела, чаму трубы, якія прарываюць, не мяняюць, а заварваюць. Дзіўна і тое, што замяніць трубу — справа двух дзён, а ваду адключаюць на два тыдні.

"Часам жа ваду даюць раней чым праз два тыдні", — супакойваюць Еўрарадыё.

А начальнік аддзела энергетыкі Мінгарвыканкама Анатоль Лаўнічук запэўнівае Еўрарадыё, што адключаць гарачую ваду будуць яшчэ як мінімум 10 гадоў.

А потым яшчэ давядзецца рамантаваць дарогі :)