Новапабудаваны амфітэатр у Горках зачынілі на рамонт
Ён быў пабудаваны да "Дажынак", але не прастаяў і два месяцы пасля іх.
Як паведамляе тэлеканал СТВ, новы культурна-забаўляльны комплекс у Горках не прайшоў выпрабавання надвор'ем. Вада пачала прасочвацца ў памяшканне адразу ж пасля першай моцнай залевы.
Начальнік аддзела архітэктуры і будаўніцтва Горацкага райвыканкама Віктар Бяляеў кажа, што амфітэатр пабудавалі за 9 месяцаў пры нарматыўных тэрмінах у 27,5 месяца. Цяпер давялося пачаць работы па дадатковым дрэнажы, каб вада не трапляла на ніжнія паверхі будынка.
У Магілёўскім абласным упраўленні капітальнага будаўніцтва кажуць, што вінаватых у кепскім будаўніцтве шмат. Маўляў, і праектны інстытут трохі памыліўся, і падрадчык няякасна выканаў працу.
Будаўнікі абяцаюць, што ўсе работыы на аб'екце скончаць ужо да канца лістапада. У снежні пасля свайго ўжо другога адкрыцця комплекс павінен працаваць у поўную сілу.
Фота — ctv.by