Nezalezhnastci Sq — Ладуцька загадаў вывесіць англамоўныя шыльды (фота)

У цэнтры Мінска з’явіліся новыя шыльды з назвамі вуліц і аб’ектаў на беларускай і англійскай мовах.

“Ведаеце, гэта паводле даручэння мэра. Ёсць такое даручэнне для цэнтральнай часткі горада. І вось першыя шыльды ўжо павесілі. Вы сабе ўяўляеце гэтыя невялічкія шыльды з трыма мовамі? У сувязі з канцэпцыяй прасторавага арыентавання ў горадзе Мінску ўсе шыльды будуць на беларускай і англійскай мовах”, — расказвае Еўрарадыё старшыня інфармацыйна-турыстычнага цэнтра “Мінск” Алена Пліс.

Калі ў еўрапейскіх сталіцах англамоўныя шыльды – звыклая з’ява, якая аблягчае жыццё турыстам, то ў нас яны з’явіліся ўсяго некалькі дзён таму. Пакуль іх можна ўбачыць толькі ў ваколіцах плошчы Незалежнасці. Цэнтральная частка праспекта, плошчы Кастрычніцкая, Свабоды і Перамогі пакуль выключна беларускамоўныя. Аднак цягам года там таксама з’явяцца англамоўныя шыльды.

120615 Eurafokus.mp3

“У цэнтральнай частцы — Верхні горад, гістарычны цэнтр, плошча Незалежнасці, магчыма, "Кастрычніцкая" плошча. Усе цэнтральныя месцы горада”, – дадае Алена Пліс.

Большасць шыльдаў на праспекце пакуль выключна беларускамоўныя.

Указальнікі для турыстаў на плошчы "Свабоды".

Цікава, што ў планах няма чыгуначнага вакзала! Турыстам давядзецца наўгад прабрацца да плошчы Незалежнасці, а адтуль рухацца па маршруце,які для іх паспеюць перакласці...

Дызайнер Васіль Андрэеў расказвае Еўрарадыё, што ідэя сама па сабе нядрэнная, а вось рэалізацыя кульгае і ўказвае на пераклад Паштамта як General post office.

“Хто перакладаў – незразумела. Калі ўзгадаць назву кампаніі General Electric – гэта ж не значыць “Галоўны электрык”. А ў інтэрпрэтацыі гэтага перакладу менавіта так і атрымоўваецца!”

Хоць гэта і не жахлівая памылка, але карэнны англічанін выраз “Галоўнае паштовае аддзяленне” хутчэй перакладзе як Central post office ці Main post office, што дарэчы напісана на сайце Паштамта.

Турыстычная інфармацыя ў горадзе амаль уся па-руску.

Апроч перакладу, 15 чэрвеня сталічныя ўлады аб’явілі і чарговы конкурс на стварэнне брэнда горада.

“Конкурс будзе праводзіцца сярод кампаній, якія будуць распрацоўваць брэнд Мінска. Па яго выніках выберуць адну кампанію”, — расказвае Еўрарадыё загадчыца Інфармацыйна-турыстычнага цэнтра “Мінск”.

Нагадаем, сталічныя ўлады ўжо атрымлівалі прапанову супрацоўніцтва ў распрацоўцы брэнда горада ад брытанскай фірмы. Англічане прасілі за працу 300 тысяч долараў. У выніку мінскія чыноўнікі вырашылі прыцягнуць да стварэння брэнда беларускіх дызайнераў. Плён іх працы павінен быць апублікаваны праз год.