На колькі крокаў перанясуць будоўлю ад Курапатаў?
Еўрарадыё налічыла 110 крокаў ад крыжа да будоўлі(фота).
26 лістапада, 13:30, на будоўлі каля “Курапатаў” пуста: ні рабочых, ні тэхнікі. Будоўля абнесеная высокай агароджай, за якім бачная складзеная цэгла, трубы, будаўнічыя матэрыялы.
Будоўля ля Курапатаў
На суседняй запраўцы рабочых сёння бачылі: тыя набывалі ежу. Аднак будоўля замарудзілася.
“Пачыналі яны шпарка, а цяпер нешта прыпыніліся. Можа, фінансаванне закончылася”, — мяркуе супрацоўніца запраўкі.
Праблема не ў фінансаванні. Міністэрства культуры знайшло парушэнні: забудоўшчыкі залезлі за ахоўваемую мяжу мемарыяла Курапаты.
“Мы выдалі прадпісанне, дзе рэкамендавалі замоўцы выканаць рэгламент, узгоднены у праекце для зоны аховы. Ёсць ахоўваемая зона, дзе ўсялякае будаўніцтва забароненае — 120 метраў ад ляснога масіву. Дарэчы, забудоўшчыкі запэўнілі, што гэта не будзе называцца “Бульбаш-хол”, — кажуць у Міністэрстве культуры.
Спрабуем замерыць. Ад апошняга крыжа ў Курапатах да будоўлі — 110 крокаў. А гэта менш за 90 метраў!
Ад крыжа да будоўлі 110 крокаў
Мінкульт адказаў і на заяву ўдзельнікаў круглага стала “Абаронім Курапаты” пра недапушчальнасць будаўніцтва “Бульбаш-хола” ля крыжоў ва ўрочышчы Курапаты. Дакумент атрымала арганізатарка звароту Ганна Шапуцька.
“Падчас выезду на месца выяўлена, што работы праводзяцца часткова ў ахоўнай зоне гісторыка-культурнай каштоўнасці. Пры гэтым іх выкананне ажыццяўляецца без дазволу Міністэрства культуры[…]. Міністэрствам культуры выдадзенае прадпісанне заказчыку работ СТОО “Белрэстінвест” і Мінаблвыканкаму аб спыненні работ ў зоне аховы гісторыка-культурнай каштоўнасці[…]. Аднаўленне работ будзе магчымае пасля забеспячэння адпаведнасці праектнай дакументацыі і яе рэалізуючым прававым нормам”, — цытуе Ганна дакумент за подпісам намесніка міністра культуры Віктара Кураша
Нагадаем, каля мемарыялу Курапаты, дзе ў 1930-я гады былі расстраляныя дзясяткі тысяч людзей, хочуць пабудаваць комплекс прыдарожнага сервісу з лазняй і рэстаранам на 400 месцаў. Стваральнікі комплексу наадрэз адмаўляюцца гаварыць з журналістамі.
Будоўля каля Курапатаў
Фота - Еўрарадыё.
