МЗС: У Лівіі затрымалі не трох, а чатырох беларусаў
Аднаго з іх трымаюць асобна ад іншых. Суд над ім яшчэ не пачаўся.
Пра гэта ў аўторак паведаміў на прэс-канферэнцыі ў Мінску начальнік галоўнага консульскага ўпраўлення МЗС Беларусі Аляксандр Астроўскі:
"Затрыманыя чацвёра беларускіх грамадзян. Затрыманыя рознымі ваенізаванымі фармаваннямі. У адным месцы знаходзяцца трое, разам з расіянамі і ўкраінцамі. І ў іншым знаходзіцца яшчэ адзін — разам з украінцам. Умовы няважныя. Яны знаходзяцца ў прыстасаваных памяшканнях — спартовай зале і сталовай".
Паводле яго слоў, супрацоўнікі беларускай амбасады ў Лівіі наведваюць затрыманых два разы на тыдзень, забяспечваюць іх лекамі, даюць магчымасць патэлефанаваць сваякам на радзіму.
Наступнае судовае паседжанне прызначанае на 4 чэрвеня.
Нагадаем, што ў жніўні мінулага года лівійскія паўстанцы затрымалі 25 грамадзянаў Беларусі, Украіны і Расіі. Усёй групе выставілі абвінавачванне ў аднаўленні вайсковай тэхнікі, якую рэжым Кадафі выкарыстоўваў для "знішчэння лівійскага народа". Самі затрыманыя кажуць, што былі завербаваныя для нафтаразведкі.
Фота — daylife.com
