Ладуцька: Працоўны праект рэканструкцыі “Дынама” рыхтуюць у Беларусі

“Гэта быў конкурс на канцэпцыю рэканструкцыі. Гэта быў не праект, а ідэалогія праекта”, ― распавядае кіраўнік Мінгарвыканкама Мікалай Ладуька падчас “гарачай лініі”.

Яўген Валошын: То бок гэта быў толькі малюнак, знешні выгляд, так?

Мікалай Ладуцька: Не толькі знешні выгляд, яшчэ і набор дадатковых рашэнняў, якія дапамагаюць комплексна ацаніць пераўтварэнне стадыёна “Дынама”. Таму, безумоўна, у аснову праекта будуць пакладзены канцэптуальныя рашэнні нямецкай кампаніі. Яна будзе ўдзельнічаць у якасці праектнай арганізацыі ў распрацоўцы працоўнага праекта.

Яўген Валошын: Звычайна паведамляецца магчымы кошт, на які пацягне рэканструкцыя. А ў дадзеным выпадку пра канкрэтныя сумы ніхто не кажа. Ці вызначыліся з коштам?

Мікалай Ладуцька: Гэта была канцэпцыя, яна не вызначала кошт. А сёння на падставах канцэпцыі ў Беларусі будзе распрацоўвацца працоўны праект, і падчас гэтага будзе сфармаваны яго кошт. Сёння мы маем разліковыя паказчыкі, параўнальныя, аналітычныя. Наша задача ― рабіць усё так, каб гэта было прафесійнае рашэнне, аптымальнае рашэнне, вартае нашага горада. Але пры гэтым грошы любяць лічэнне. Грошы неабходна лічыць.

Яўген Валошын: На вока працы праводзяцца павольна. Пачалі першага снежня і дагэтуль не разабралі трыбуну, якую ў народзе называюць “брыль”.

Мікалай Ладуцька: Вы пад’едзьце туды, калі ласка, паглядзіце.

Пад’язджаем на “Дынама”. Брама цэнтральнага ўваходу ― замкнутая. На пляцоўцы ляжыць чырвона-сіняя канструкцыя, падобная на вежавы кран. Ля яе ―  бетонныя кавалкі, адбітыя ад задняй часткі “брыля”. Зайшоўшы на стадыён, бачым рабочых, якія здымаюць сінія сядзенні з іншай трыбуны пад “брылём”. То бок працы па разборы стадыёна вядуцца. Але відавочна, што заканчэнне рэканструкцыі ўвосень 2014-га года, як патрабаваў прэзідэнт, будзе фантастыкай.

Нягледзячы на ашчаднасць падчас рэканструкцыі, можна ўжо сёння ўявіць, у колькі абыдзецца “Дынама”. Кампанія GMP, да прыкладу, выступае праектнай арганізацыяй у будаўніцтве шэрагу стадыёнаў.

“Амазонія Арэна” ў бразільскім Манаўсе, паводле інфармацыі газеты Spiegel, абыдзецца ў 200 мільёнаў еўра. А адно пасадачнае месца пацягне на 4700 еўра.

Стадыён у Калінінградзе, які збіраюцца збудаваць да чэмпіянату свету-2018, пацягне на 210 млн еўра. А кошт аднаго пасадачнага месца складзе каля 4770 еўра.

Кошт аднаго пасадачнага месца падчас рэканструкцыі кіеўскага стадыёна “Алімпійскі” склаў каля 5270 еўра.

Згодна з досведам па названых стадыёнах, рэканструкцыя “Дынама” можа пацягнуць на суму ад 180 мільёнаў еўра ― куды больш, чым вымагаў праект венгерскай кампаніі Graboplan, ад чыіх паслуг адмовіліся.

У кожным разе кошт аднаго пасадачнага месца падчас будаўніцтва ці рэканструкцыі сучаснага стадыёна абыходзіцца ад 3000 еўра. Такім чынам, рэканструкцыя “Дынама” павінна абысціся мінімум ад 120 мільёнаў еўра.