Квіткі ў Нясвіжскі замак падаражэлі на 66%
Цяпер уваходны квіток каштуе 20 тысяч рублёў — перад тым яго кошт быў 12 тысяч.
Як патлумачылі Еўрарадыё ў касе замка, гэта звязана з адкрыццём трох новых залаў — Вялікай сталовай, Малой сталовай і Бальнай залы. Хоць афіцыйнага адкрыцця залаў не было, турыстаў туды ўжо пускаюць. У кошт 20 тысяч закладзеныя і 3 тысячы за наведванне замкавых паркаў.
Яшчэ некалькі гадоў таму ўваходны квіток у замак каштаваў 4 тысячы рублёў. Такім чынам, кошт за гэты час узрос у 5 разоў. Варта адзначыць, аднак, што арыгінальных экспанатаў у замку вельмі мала —некалькі старадаўніх прадметаў мэблі, якія не належалі Радзівілам, а былі набытыя ў антыквараў. Усе карціны ў замку — копіі з беларускіх і польскіх музеяў. Нягледзячы на гэта толькі за мінулы год Нясвіжскі замак наведалі 180 тысяч чалавек.