Фотафакт: Кубінец працуе трактарыстам у Беларусі
Хаўер Эстрада ўзяў шлюб з беларускай Верай падчас вучобы ў Маскве яшчэ ў савецкія часы.
Доўгі час яны жылі на Кубе, у іх нарадзіліся дзве дачкі. Эстрада працаваў галоўным інжынерам на прадпрыемстве, а жонка — галоўным энергетыкам раёна. У 2008 годзе яны рашыліся пераехаць у Беларусь, у Свіслацкі раён. Там уладкаваліся на працу ў СВК "Новы Двор-Агра": Хаўер — механізатарам, Вера — інжынерам-энергетыкам.
Як адзначае БЕЛТА, у гаспадарцы пра 48-гадовага трактарыста кажуць, што ён працавіты і адказны, пазнаёміўся з мясцовымі людзьмі, з беларускай нацыянальнай кухняй. Ён збірае грошы на ўласны дом і дапамагае сваім сваякам, якія засталіся на Кубе.
Фота — БЕЛТА, grodnonews.by
