Кібершпіёны збіралі інфармацыю беларускіх дзяржаўных установаў
Антывірусная Лабараторыя Касперскага выявіла міжнародную сетку пад кодавай назвай "Red October" ("Чырвоны кастрычнік"), якая займалася кібершпіянажам.
Як паведамляе інтэрнэт-старонка лабараторыі, на працягу апошніх пяці гадоў супраць дыпламатычных ведамстваў, дзяржаўных структур і навукова-даследчых арганізацый розных краін свету праводзілася аперацыя кібершпіянажу. Падчас яе збіраліся дадзеныя і сакрэтная інфармацыя з мабільных прыладаў, кампутараў і сеткавага абсталявання. У зону цікавасці кібершпіёнаў патрапіла таксама Беларусь.
Выкрадзеная інфармацыя відавочна з'яўляецца вельмі канфідэнцыйнай. Яна складаецца з розных геапалітычных дадзеных, якія могуць быць скарыстаны на дзяржаўным узроўні.
За апошнія месяцы адмыслоўцы лабараторыі выявілі некалькі сотняў заражэнняў адмысловым складаным вірусам па ўсім свеце. У Беларусі было выяўлена 5 такіх заражэнняў.
Лабараторыя Касперскага лічыць, што за нападам стаяць кітайскія і рускамоўныя хакеры.
Фота — securelist.com
