"Фольксваген" урэзаўся ў помнік Кастусю Каліноўскаму (фота)
Аварыя, у якой пацярпелі 2 чалавекі, адбылася 14 студзеня ў Баранавіцкім раёне каля вёскі Мілавіды.
Як паведамляе INTEX-PRESS, 56-гадоваму кіроўцу стала дрэнна і ён не справіўся з кіраваннем. Машыну вынесла ў кювет, і яна стукнулася ў агароджу помніка на месцы бітвы 1863 года.
Кіроўца не пацярпеў, аднак двух пасажыраў даставілі ў Баранавіцкую гарадскую бальніцу. 54-гадовая жанчына атрымала траўмы, але здолела выбрацца з аўтамабіля самастойна. А вось 49-гадовы мужчына быў заблакаваны на пярэднім сядзенні. Каб вызваліць яго, спатрэбілася дапамога ратавальнікаў.
Паводле папярэдніх звестак, іх жыццям нічога не пагражае.
Фота — 112.by
