Даярка, якая скрала 2 літры малака: Выплачу штраф – застанемся без хлеба
У краме жанчына набывае малако, дзе паменш тлушчу, бо каштуе танней.
За скрадзеныя дзесяць літраў малака чатыром даяркам СВК “Валадарскі” далі штраф — 1 мільён кожнай. І гэта пры заробку ў 1,6 мільёна на месяц!
“Аплачу наяўнымі — і будзем без хлеба сядзець. Я хоць адна, у мяне дзяцей няма, а атрымала 1,6 мільёна — ну што гэта? Але, зразумела, непрыемна і сорамна, разумею, што я не мела рацыі”, — адразу кажа Еўрарадыё даярка Наталля Дзянішчыч.
Жыве з мужам, які цяпер не працуе — нядаўна рабілі аперацыю. А малако даярка набывае ў краме, абястлушчанае, бо так танней.
“Яно каштуе пяць з нечым тысяч. Раней брала абястлушчанае 1,5% тлушчу, нашмат танней”, — тлумачыць Наталля. І дадае, што добры заробак плацяць толькі калі масава целяцца каровы — красавік травень. Тады можна зарабіць да 4 мільёнаў.
Даярка Таццяна Караленка прызнаецца, што скрала з фермы 2 літры малака для дзяцей. Жанчына выхоўвае сына і дачку з унучкай.
“Я прасіла, можа, каб з заробку вылічылі гэты штраф. Яны адказваюць — а раптам вы кінеце працу. А як я кіну? У мяне дачка нарадзіла, маладая ёй 18 гадоў. І сын — дзесяць гадоў — хворы, у яго ногі, артрыт. Дачцэ даюць харчаванне на дзіця, але хапае на паўмесяца. Сыну лекі набыць… я ў даўгах…”, — расказвае Таццяна Караленка. Яе заробак 1,4 мільёна рублёў.
Жанчына жыве з сужыцелем, які таксама працуе. Маюць невялікую гаспадарку, так што, ежа ёсць, супакойвае Таццяна Караленка:
“Ежа ёсць, бо заб’еш парася — сала ёсць. Куры таксама ёсць”.
Да таго ж жанчына набыла сыну ў падарунак камп’ютар у крэдыт. Плаціць штомесяц 420 тысяч. А малако таксама набывае ў краме.
Калі пералічыць у малако, то заробак даяркі з СВК “Валадарскі” — 233 літры ў месяц. З іх 166 літраў — гэта штраф.
У гаспадарцы “Машэраўскі” Брэсцкай вобласці здзіўляюцца заробку даяркі ў 1,4 мільёна. І запэўніваюць, у іх зарабляюць мінімум у паўтары разы больш.
“Не, пра такія заробкі ў нас і размовы няма. У нас у сярэднім ад трох да чатырох мільёнаў. Менш за 2,5 мільёны няма”, — адказваюць у “Машэраўскім”.
А ў калгасе імя Неўскага Магілёўскай вобласці даярка зарабляе ў сярэднім 2,5 мільёны, адказваюць у эканамічным аддзеле.
Дарэчы, паводле Аляксандра Лукашэнкі даяркі ў Беларусі атрымліваюць па 700-800 долараў. "Мы пачалі будаваць нармальнае жыццё для людзей. Даярка на ферме ў добры перыяд атрымлівае 700-800 долараў", — казаў кіраўнік краіны на прэс-канферэнцыі для расійскіх СМІ яшчэ ў 2007 годзе.
Фота: bymedia.net
