Чыноўнікі набываюць “Таёты” за 100 тысяч долараў, а “Фольксвагены” за 13
Еўрарадыё высветліла, аўтамабілі якіх марак найбольш запатрабаваныя ў гаражах беларускіх дзяржустановаў.
“Зараз AUDI А4 актыўна прадаецца. Там быў рэстайлінг, абнаўленне. Плюс кошт адносна прывабныя — 23 тысячы еўра. Таму так — гэта самы дэфіцытны аўтамабіль зараз”, — гавораць Еўрарадыё ў аддзеле продажаў "Аўтасалон — AV", афіцыйнага прадстаўніка AUDI у Беларусі.
Нагодай для размовы стала набыццё Міністэрствам абароны двух AUDI А4 для патрэбаў Вайсковай аўтаінспекцыі. Іх фота з’явіліся на сайце Onliner.
Але міністэрствы набываюць не толькі AUDI. У “Таёта Цэнтр Мінск” Еўрарадыё расказваюць, што папулярнасцю ў дзяржструктур карыстаюцца далёка не самыя танныя мадэлі маркі.
“У нас купляюць прэзідэнцкія гаражы. У нас часта дзяржструктуры набываюць аўтамабілі. Гэта ў асноўным Camry, Land Cruiser 150, Land Cruiser 200. Гэта самыя хадавыя. Але зараз тэндэнцыя — 2011-2012 гады — больш набываюць юрыдычныя асобы. Таму ля дзяржустановаў могуць знаходзіцца аўтамабілі дырэктараў нейкіх прадпрыемстваў”.
Сярэдні кошт на Camry — 40 тысяч долараў. Можна і за 60 набыць у лепшай камплектацыі. Новы Land Cruiser каштуе 100 тысяч. Менавіта на Toyota Camry можна заўважыць у горадзе міністра культуры Паўла Латушку.
Land Cruiser ля Нацыянальнага прэс-цэнтра падчас прэс-канферэнцыі намесніка прэм'ер-міністра Анатоля Калініна.
Набываюць чыноўнікі і “Мэрсэдэсы”. У афіцыйным прадстаўніцтве аўтамабільнай кампаніі ў Мінску гэты факт пацвярджаюць, аднак падрабязнасці раскрываць не сталі.
А вось “Фольксваген” беларускія чыноўнікі не любяць. Набываюць машыны гэтай маркі толькі ніжэйшага ўзроўню. Міністраў у такіх не возяць.
“З легкавога транспарта адназначны рэкардсмен гэтага году — Volkswagen Polo. Седан. Базавая версія — за 13400. З прадстаўніцкага класу Phaeton i Touareg не вельмі запатрабаваныя. Традыцыйна ля міністэрстваў стаяць “Таёты” і “Мэрсэдэс”.
І ГАЗ, і “АўтаВАЗ” таксама прадаюць свае машыны беларускім дзяржаўным установам. Але гэта ў асноўным недарагія мадэлі.
“Дзяржструктуры і ёсць нашыя асноўныя кліенты. Вось у мінулым месяцы прадалі 150 аўтамабіляў, выканалі план. Пад заказ там усё што заўгодна робіцца — шклопад’ёмнікі, сігналізацыя, DVD. Усё ставіцца”, — гавораць у прадстаўніцтве ГАЗ.
У “Мінск-Лада” расказваюць, што дзяржструктурам прадаюць у асноўным “Нівы”, “Сямёркі” і “Гранты”.
Дарэчы, беларускія чыноўнікі ездзяць на “Аўдзі”, “Мэрсэдэсах” і “Таётах” зусім не расійскай зборкі. Толькі Camry нядаўна пачалі збіраць пад Пецярбургам.
“У нас купляюць прэзідэнцкія гаражы. У нас часта дзяржструктуры набываюць аўтамабілі. Гэта ў асноўным Camry, Land Cruiser 150, Land Cruiser 200. Гэта самыя хадавыя. Але зараз тэндэнцыя — 2011-2012 гады — больш набываюць юрыдычныя асобы. Таму ля дзяржустановаў могуць знаходзіцца аўтамабілі дырэктараў нейкіх прадпрыемстваў”.
