Бард і кампазітар Нікіцін выказаў пратэст Башмету з-за Пуціна
Сяргей Нікіцін адмовіўся ад удзелу ў юбілейным вечары дырыжора Юрыя Башмета. 24 студзеня сусветна вядомаму дырыжору споўніцца 60 гадоў.
Нагодай стала публічная падтрымка Башметам так званага "закона Дзімы Якаўлева" і прызнанне дырыжора ў любові да прэзідэнта Расіі Уладзіміра Пуціна, перадае ВВС.
Незадаволенасць Нікіціна выклікалі выказванні Башмета на брыфінгу, прысвечаным яго хуткаму юбілею. Дырыжор тады заявіў: "Я сам не лічу Амерыку сваім галоўным начальнікам, і вось за гэта я і люблю Пуціна, што ён умее сказаць: "Мы не Амерыка, мы Расія, і нам не патрэбныя амерыканскія начальнікі".
Нагадаем, што ў канцы снежня ў Расіі быў прыняты скандальны "закон Дзімы Якаўлева". Адзін з яго пунктаў забараняе амерыканцам усынаўляць сірот з Расіі. Расійскі закон стаў адказам на амерыканскі "акт Магніцкага". Дакумент ЗША ўводзіць візавыя абмежаванні для расіян, якіх у Штатах лічаць вінаватымі ў смерці юрыста Сяргея Магніцкага за кратамі ў 2009 годзе.
Фота — obradoval.ru