Андрэя Пачобута двойчы папярэдзілі за адно і тое ж парушэнне
За тое, што забыў адзначыцца ў міліцыі месяц таму, 19 снежня сваё папярэджанне вынесла пракуратура.
“14.11.2011 Пачобут А. С. дапусціў парушэнне парадку адбыцця пакарання, не з’явіўшыся для рэгістрацыі ў крымінальна-выканаўчую інспекцыю аддзялення ўнутраных спраў без паважлівых прычын”, - пішацца ў афіцыйным папярэджанні, якое дублюе папярэджанне, атрыманае раней у міліцыі.
Паперу журналісту ўручыў пракурор Аляксандр Южык у пракуратуры Ленінскага раёну Гродна. Туды Андрэя Пачобута раптоўна выклікалі пасля таго, як той адзначыўся ў інспекцыі. Пасля трох папярэджанняў журналісту могуць адмяніць адтэрміноўку пакарання і адправіць у турму.
Нагадаем, што ў ліпені беларускі карэспандэнт польскай "Газеты Выборчэй" атрымаў умоўны тэрмін за абразу кіраўніка Беларусі Аляксандра Лукашэнкі.
