Расійскі сацыёлаг патлумачыў, чаму 78% расіян выступаюць за візы з Беларуссю

Расійскі сацыёлаг патлумачыў, чаму 78% расіян выступаюць за візы з Беларуссю

Кіраўнік дэпартамента даследаванняў Усерасійскага цэнтра даследавання грамадскай думкі Сцяпан Львоў пракаментаваў для Еўрарадыё вынікі апошняга апытання. Яно было праведзенае па тэлефоне 8-9 лютага, сацыёлагі апыталі 1200 чалавек з усёй Расіі. 60% апытаных паведамілі, што не хочуць, каб Расія давала Беларусі зніжкі на газ. 78% жыхароў Расіі падтрымалі ўвядзенне візавага рэжыму з Беларуссю. 40% расіян успрымаюць Беларусь як сяброўскую дзяржаву, 35% — як гандлёвага і эканамічнага партнёра, 9% — як стратэгічнага партнёра. 4% апытаных лічаць Беларусь канкурэнтам Расіі, а 3% — праціўнікам.

 

Еўрарадыё: Чаму вы вырашылі правесці такое апытанне менавіта цяпер?

Львоў: Таму што ёсць інфармацыйная нагода. Мы перыядычна праводзім даследаванні. Зараз узнікла такая нагода. Існуюць непаразуменні па аплаце газу і нафты, Беларусь увяла бязвізавы рэжым з 80 краінамі.

Еўрарадыё: Вас нешта здзівіла ў выніках апытання?

Львоў: Па вялікім рахунку, здзівіла жорсткая пазіцыя расіян у дачыненні да Беларусі па газавым пытанні. Мы чакалі больш лаяльнага падыходу. Робіцца зразумелым, што цяпер у Расіі ўсё больш перамагае погляд на Беларусь як на гандлёвага партнёра, а не сяброўскую дзяржаву. Перамагае рацыянальны падыход.

Еўрарадыё: Згодна з вашай публікацыяй, у 2008 годзе 50% расіян лічылі Беларусь сяброўскай дзяржавай. Цяпер — толькі 40%. Чаму так?

Львоў: 10% — гэта не такая сур'ёзная ацэнка. Раней было больш размоваў аб Саюзнай дзяржаве ў СМІ, цяпер іх стала нашмат менш.

Еўрарадыё: 78% расіян лічаць магчымым увесці візавы рэжым з Беларуссю. Што гэта можа значыць?

Львоў: Для большасці расіян увядзенне візавага рэжыму з Беларуссю не з'яўляецца вялікай стратай. Расіяне, у адрозненне ад беларусаў, значна радзей перасякаюць гэтую мяжу. Таму яны лічаць магчымым увесці візы ў якасці аднаго з варыянтаў захавання бяспекі. Але гэта не з'яўляецца праявай варожасці да Беларусі.

Еўрарадыё: Вашы пытанні аб захаванні альбо скасаванні бязвізавага рэжыму ўтрымліваюць разгорнутыя тлумачэнні таго, чым гэта можа пагражаць расіянам. Чаму былі выкарыстаныя такія фармулёўкі?

Львоў: Заўсёды трэба разумець, што рэспандэнт можа не валодаць сітуацыяй, не можа ўсё ведаць. Яму трэба прапанаваць варыянты.

Еўрарадыё: Але ці насамрэч з'явілася пагроза Расіі? Да ўвядзення бязвізавага рэжыму замежныя грамадзяне маглі атрымаць беларускую візу і прыехаць у Расію праз празрыстую мяжу. Што змянілася?

Львоў: Раней замежнаму грамадзяніну было неабходна атрымаць беларускую візу, прайсці праверку праз вашы міграцыйныя службы. Існавала заслона. Цяпер такой неабходнасці больш няма. Цяпер узнікла рызыка, што не будзе кантролю.

Апошнія навіны

Галоўнае

Выбар рэдакцыі