Прэзентацыя на Еўрарадыё: ЕР "Пад знакам крумкача" ад гурта Rokash

Гурт Rokash прадстаўляе на Еўрарадыё новы ЕР "Пад знакам крумкача", створаны адмыслова да 10-гадовага юбілею каманды. Музыкі называюць яго своеасаблівым падарункам сабе і прыхільнікам.

"ЕР уключае 4 песні і адмыслова мае восеньскую афарбоўку, восеньскае гучанне і светлую меланхолію, — распавядае пра ўнутраны складнік міньёна ідэолаг гурта Лявон Казакоў. — Рэліз адлюстроўвае тое, у якім рэчышчы мы працуем менавіта цяпер — гэта такі фолк-арт-рок з мяккім і лірычным гучаннем, аднак у ім прысутнічаюць і адмысловыя рокавыя ноткі".

За 10 гадоў музыка Rokash прайшла шлях ад акустычнага медыяваль-фолка да неа-фолк-рока. 25 кастрычніка ў клубе Re:Public гурт зладзіць экскурс па сваёй творчасці: Rokash прэзентуюць новы ЕР і выканаюць лепшыя песні. Віншаваць каманду збіраюцца сябры, якія адыграюць у гонар гурта невялікія сэты. Сярод іх — Re1ikt, Unia, Pawa, Rosy і Алег Хаменка.

Пачатак канцэрта ў 19.00. Кошт квіткоў ад 90 да 150 тысяч рублёў.

Даведкі па тэлефоне (029) 649 08 88.