Перад канцэртам у Мінску Вакарчук мусіць удакладніць: ці пусцяць яго ў Беларусь?

Вырашыў загадзя зрабіць сабе падарунак і набыць квіток на канцэрт гурта “Океан Ельзи” — у Мінску яны акурат на мой дзень народзінаў 10 снежня. Так напісана на сайце ўкраінскай каманды. Толькі падумалася: а што калі лідара “Океана Ельзи” Святаслава Вакарчука не пусцяць у Беларусь памежнікі? Нехта скажа, што сітуацыя выглядае неверагоднай, але…

Паміж Беларуссю і Расіяй падпісанае адпаведнае пагадненне: мы не пускаем на тэрыторыю Беларусі замежнікаў, якія ўнесеныя ў расійскі “спіс асоб, уезд якіх на тэрыторыю РФ забаронены”, каб гэтыя “непажаданыя асобы” не праніклі ў Расію праз Беларусь.

25 красавіка ў Беларусь не пускаюць украінскага дэпутата Ігара Гузя. Усё з-за таго, ён у расійскім “чорным спісе”.

На наступны дзень, 26 красавіка, беларускія памежнікі спрабуюць не пусціць у Беларусь першага віцэ-спікера Вярхоўнай Рады Украіны, удзельніка перамоў Кантактнай групы па ўрэгуляванні канфлікту ва Украіне Ірыну Герашчанка. Нягледзячы на тое, што ехала палітык у Мінск на пасяджэнне гэтай самай Кантактнай групы.

“Так, мне сапраўды афіцыйна забаронены ўезд у Беларусь. І калі я імчала з Бруселя ў Мінск, я ведала, што магу правесці ноч на стульчыку ў мінскім аэрапорце”, — піша ў Фэйсбуку Ірына Герашчанка 27 красавіка.

У афіцыйным лісце за подпісам начальніка Дэпартамента па грамадзянстве і міграцыі МУС Беларусі Аляксея Бегуна, які ў адказ на свой запыт атрымала амбасада Украіны напярэдадні пасяджэння Кантактнай групы і паездкі Ірыны Герашчанка ў Мінск, так проста і гаворыцца: “Па стане на 22 красавіка 2016 года грамадзянка Украіны ўключаная ў спіс асоб, уезд якіх у Рэспубліку Беларусь забаронены альбо непажаданы па ініцыятыве кампетэнтных органаў Расійскай Федэрацыі”.

Пытанне вырашылі: далі Першаму віце-спікеру Вярхоўнай Рады дазвол да 25 мая наведваць Беларусь.

У эксклюзіўным каментарыі Еўрарадыё Першы віцэ-спікер Вярхоўнай Рады Украіны Ірына Герашчанка сітуацыю апісвае досыць дыпламатычна.

Тым не менш, палітык раіць “кампетэнтным органам Беларусі” прыняць усе неабходныя рашэнні, каб больш такіх казусаў не здаралася.

“Паколькі яна знаходзіцца ў пастаянна дзеючай групе, то мы цяпер вырашаем пытанне, прынамсі разглядаем, аб тым, каб выключыць яе з беларускай часткі спісу… Ну, я маю на ўвазе, каб яна ў Беларусь без гэтых дазволаў прыязджала”, — запэўнівае Еўрарадыё начальнік Дэпартамента па грамадзянстве і міграцыі МУС Беларусі Аляксей Бягун.

І тлумачыць, што магчымасці такія ў беларускага боку ёсць.

Аляксей Бягун: “Пагадненне (з Расіяй) дазваляе нам дапускаць на тэрыторыю краіны асобу, якая ўнесеная ў спіс. Але мы павінны прадпрыняць меры, каб гэтая асоба на тэрыторыю іншай краіны не з’ехала, і самі павінны забяспечыць кантроль за яе знаходжаннем на тэрыторыі Беларусі”.

Чаму беларускія памежнікі не пайшлі насустрач Ігару Гузю, а завярнулі на мяжы?

“Калі ён (Ігар Гузь, — Еўрарадыё) ведаў, што ён знаходзіцца ў расійскім спісе, ён павінен быў загадзя напісаць, патлумачыць мэты свайго знаходжання ў Беларусі, пры гэтым, прымаючы бок павінен быў звярнуцца. Тады было б прынятае рашэнне: пускаць яго на тэрыторыю краіны ці не пускаць”, — тлумачыць сітуацыю Аляксей Бягун.

Праўда, сам удакладняе: беларускі бок паведамляе чалавеку, унесенаму ў адпаведны “беларускі чорны спіс”, што ўезд у Беларусь забаронены. У расіян іншы падыход.

Бягун: “Не заўжды яны гэта робяць. Я ведаю дакладна. У гэты спіс трапляюць нават замежнікі, якія жывуць у Беларусі, і часам парушаюць расійскае заканадаўства. Потым нам прыходзіць паведамленне, мы іх запрашаем, бярэм распіску, што яны абяцаюць не ўязжаць у Расійскую Федэрацыю, і гэтак далей”.

Ігар Гузь пра тое, што ён неўязны ў Расію і, адпаведна, у Беларусь нічога не ведаў. Ірына Герашчанка зразумела гэта выпадкова: “Мы зразумелі яшчэ некалькі тыдняў таму, калі падчас апошніх паездак у Мінск уся наша маленькая ўкраінская дэлегацыя чакала па 40 хвілін на пашпартным кантролі пакуль мой дыпламатычны пашпарт “не сканаваўся”. Памежнікі-мытнікі хавалі вочы, бегалі за начальнікам змены, званілі некуды і, каб пазбегнуць скандалу, давалі разавы дазвол на ўезд у краіну”, — тлумачыць Герашчанка.

Дык а што з лідарам гурта “Океана Ельзи” — раптам і ён неўзяны ў Расію і Беларусь, і не ведае пра гэта? Сказаць гэта мне, журналісту, Аляксей Бягун не можа: “таямніца персанальных дадзеных”. Скажуць толькі асабіста Вакарчуку ці арганізатарам канцэрта “Океана Ельзи” ў Мінску. А што далей? “Мы можам дапусціць на тэрыторыю краіны, калі ёсць адпаведны зварот”, — адказвае кіраўнік Дэпартамента па грамадзянстве і міграцыі. Ёсць толькі адно “але”: па прыездзе ў Беларусь такі дапушчаны ў нашу краіну “чорнаспісачнік” мусіць даць адно абяцанне.

Аляксей Бягун: “Мы павінны узяць пісьмовае абавязальніцтва, дзе ён азнаёміцца з крымінальнай адказнасцю, якая дзейнічае ў РФ за ўезд на тэрыторыю краіны. Я думаю, чалавек, які падпісаў, павінен быць… дрэнна думаючым, каб паехаць адразу ў турму”.

Дарэчы, па словах Ірыны Герашчанка, яна ніякіх папер з абавязальніцтвамі не ехаць з Мінска ў Расію не падпісвала. Адно дадае: пра сітуацыю са спробай не пусціць яе на перамовы Кантактнай групы даведаўся ўвесь свет, што дрэнна ўплывае на “міратворчы імідж” нашай краіны. “Мы спадзяёмся, што гэта сапраўды будзе нейтральная пляцоўка”, — кажа Ірына Герашчанка.

Можа, Мінску варта было б уважліва праглядзець той расійскі “чорны спіс” і людзей, якія не нясуць пагрозы Беларусі, пускаць у нашу краіну? Узяўшы распіску, што ў Расію не паедуць?

Аляксей Бягун: “У спісе цяпер больш за 1 мільён персанальных дадзеных людзей! Кожны запіс унікальны і не паўтараецца. Больш за 1 мільён! Як, каго правяраць там?!”

Такім чынам, арганізатарам мінскага канцэрта “Океана Ельзи” лепш напярэдадні даведацца, ці не будзе праблем на мяжы.

Фота: Еўрарадыё, www.belaruspartisan.org