Паўфінал Еўрабачання: каб гледачы не выбралі каго, і не было потым сорамна
У фінал нацыянальнага адбору на “Еўрабачанне-2016” праходзяць толькі дзесяць выканаўцаў замест пятнаццаці, дазволеных рэгламентам конкурсу. Чаму журы так і не здолела выбраць 15 вартых прадстаўніцтва краіны на міжнародным конкурсе, адразу пытаемся у старшыні журы Аляксандра Ціхановіча.
“У прынцыпе, пятнаццаць прэтэндэнтаў на фінал было, — відавочна не чакае пытання Аляксандр Ціхановіч. — Але недзе выкананне не вельмі, недзе… ну, былі нейкія агрэхі, таму вырашылі зрабіць дзесяць. Мы вырашылі так, што праходзяць без размоваў выканаўцы, якія з прафесійнага пункту гледжання, найперш, натуральна, вартыя гэтага. Тэлегледачам будзе дастаткова і маленькага выбару. Каб раптам яны не выбралі каго-небудзь, і не было потым сорамна”.
Запомнім гэты выраз мэтра “каб раптам яны (гледачы) не выбралі каго-небудзь і не было потым сорамна”. Справа ў тым, што сёлета ў фінале выбіраць прадстаўніка Беларусі на Еўрабачанне будуць выключна гледачы. Журы да гэтага працэсу дачынення мець не будзе. Таму паўфінальны адбор атрымліваецца вельмі жорсткім. Большасць выканаўцаў — невядомыя, ці малавядомыя музыкі.
Які ж нацыянальны адбор без скандалу? Аматары "Еўрабачання" ў інтэрнэце пачалі кампанію па змене вынікаў паўфіналаў. Яны патрабуюць дадаць у спіс фіналістаў каманду зомбі “Sweet Brains”, якая беспаспяхова ўдзельнічае ў конкурсе другі год запар і палюбілася гледачам.
“Спадарства, прашу гэтым разам не дапусціць таго, каб пракідвалі асноўных фаварытаў па меркаванні міжнароднай супольнасці фанатаў "Еўрабачання" OGAE Belarus — зомбі-бэнд Sweet Brains з песняй "Dance like zombies", — піша адзін з каментатараў і яго падтрымліваюць многія. — Надышоў час напісаць адкрыты зварот да Прэзідэнта з просьбай умяшацца ў гэтую анархію ў журы конкурсу. Чаму рэзка прынялі рашэнне, зрабіць дзесяць фіналістаў, а не пятнаццаць, хоць заўсёды рабілі менавіта так? Няўжо цяжка дапусціць яшчэ адну каманду і паглядзець, як прагаласуюць людзі за Sweet Brains у жывым эфіры. Калі народ вырашыць, што яны горшыя іншых, то так таму і быць, але калі народ абярэ іх, то яны павінны прадставіць нашу краіну на "Еўрабачанні" ў Швецыі”.
На сайце Change.org петыцыю ў падтрымку зомбі-гурта падпісалі 305 чалавек.
“Ну вы мяне прабачце, гэта нават не абмяркоўвалася, — каментуе адсутнасць глядацкіх фаварытаў у спісе фіналістаў Аляксандр Ціхановіч. — Ну, як не абмяркоўвалася!? Абмяркоўвалася, але… зразумела, што прафесійны ўзровень твора… Ну, як вы сабе ўвогуле прадстаўляеце Беларусь і… давайце іх адправім! Нармальна будзе? Яшчэ раз вам кажу, што з прафесійнага пункту гледжання іх песня мусіць быць лепей”.
Пасля абвяшчэння фіналістаў аматары "Еўрабачання" называюць і магчымых сёлетніх пераможцаў — Аляксея Гроса ды Аляксандра Іванова. Яно і не дзіўна. Аляксей — пратэжэ прадзюсарскага цэнтра “Спамаш”, які штогод змагаецца за паездку на “Еўрабачанне” і аднойчы са скандалам прасунуў Алёну Ланскую. Аляксандр — “любімчык Віктара Дробыша”, як яго прадстаўлялі на адборы. А калі ўзгадаць, што Дробыш месяц таму атрымаў ордэн Скарыны… Дададзім сюды і тое, што Белтэлерадыёкампанія аплачвае прадстаўніку краіны толькі саму паездку і знаходжанне на конкурсе. Запіс жа песні, падрыхтоўка нумару, касцюмы і ўсе астатнія выдаткі кладуцца на плечы саміх выканаўцаў. У выніку можна здагадацца, якая гарачая барацьба разгорнецца паміж гэтымі выканаўцамі.
Адборачныя туры "Еўрабачання" прайшлі 26 лістапада і 1 снежня. Фінал нацыянальнага адбору на Еўрабачанне-2016 адбудзецца не пазней за 25 студзеня 2016 года ў фармаце тэлеканцэрта ў жывым эфіры. За права прадстаўляць нашу краіну будуць змагацца Аляксандр Іваноў, Валерыя Садоўская, Анастасія Малашкевіч, гурт Navi, Аляксей Грос, Кірыл Ермакоў, гурт "Радиоволна", Саша Захарык, гурт Napoli, гурт The EM.
