На Брэстчыне дырэктара завода арыштавалі за хабар у 48 тысяч еўра
Па курсе Нацыянальнага банка гэта склала амаль 460 мільёнаў рублёў, і лічыцца асабліва буйным памерам.
Супрацоўнікі праваахоўных органаў затрымалі дырэктара кукурузакалібровачнага завода ТАА "Брэст-Травы" па падазрэнні ў атрыманні хабару.
Па звестках праваахоўнікаў, якія пераказвае interfax.by, дырэктар завода (ён жа дэпутат сельскага Савета 26 склікання) з ліпеня па верасень 2013 года атрымаў ад мінчанкі, якая кіруе прадстаўніцтвам нямецкай кампаніі "LTV Landmaschinen und Transporttechnik Vertriebsgesellschaft mbH", хабар у 48 тысяч еўра.
За гэтыя грошы дырэктар павінен быў падпісаць кантракт на закупку ў нямецкай кампаніі сушыльнага комплексу для кукурузных пачаткаў "PETKUS" і сямі камбайнаў "Bourgon". Сума закупкі складала больш за 7 мільёнаў еўра. Грошы вылучаліся з рэспубліканскага бюджэту для мадэрнізацыі вытворчасці кукурузакалібровачнага завода ТАА "Брэст-Травы".
Цяпер дырэктара завода ўзялі пад варту.
Фота — fotolia.com