Мядзведзеў назваў словы Лукашэнкі пра чужыя войны "вельмі дзіўнымі"

Мядзведзеў назваў словы Лукашэнкі пра чужыя войны "вельмі дзіўнымі"

Дзмітрый Мядзведзеў назваў словы Аляксандра Лукашэнкі пра чужыя войны "вельмі дзіўнымі". Расійскі прэм'ер-міністр падчас знаходжання ў Бангкоку адрэагаваў на выказванне беларускага кіраўніка, якое прагучала ў інтэрв'ю тэлевізійнаму інфармагенцтву "Хабар" з Казахстана.

Лукашэнка гаварыў пра тое, што цяпер беларусы самі вырашаюць свой лёс, а раней даводзілася жыць пад бізуном чужынцаў. "Хтосьці намі панукваў, хтосьці спрабаваў на калені паставіць, — гаварыў кіраўнік дзяржавы. — Асабліва ў Беларусі. Усе гэтыя войны — не нашы войны". Ён згадаў вайну 1812 года, Першую сусветную, Рыжскую дамову, Другую сусветную вайну.

"Цалкам Беларусь сцерлі з твару зямлі, — працягваў Аляксандр Лукашэнка. Гэта не нашы былі войны... Мы ў апошняй вайне траціну нашага насельніцтва страцілі. У асноўным грамадзянскага насельніцтва. У чым былі вінаватыя дзеці, старыя?".

Дзмітрыя Мядзведзева папрасіла пракаментаваць словы Лукашэнкі пра "ўцягванне беларусаў у Айчынныя войны" журналістка радыёстанцыі "Маяк".

"Мы ні ў якім разе не павінны кідаць хоць нейкі цень на подзвіг нашых продкаў, якія абаранялі сваю зямлю, — жылі на тэрыторыі сучаснай Расеі або Беларусі..., — гаварыў расійскі прэм'ер. — Так было ў 1812 годзе, так было ў перыяд Першай сусветнай вайны, якую б адзнаку ні давалі ёй гісторыкі, так, натуральна, было ў перыяд 2-й сусветнай або Вялікай Айчыннай вайны".

Мядзведзеў падкрэсліў, што "гэта не ўдзел у чужых войнах". Таму для яго "вельмі дзіўна чуць такія словы" Аляксандра Лукашэнкі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі