МУС хоча ўвесці бальную сістэму пакаранняў для кіроўцаў-парушальнікаў
МУС хоча ўвесці бальную сістэму пакаранняў для кіроўцаў-парушальнікаў правілаў дарожнага руху. Пра гэта па выніках сустрэчы ў кіраўніка дзяржавы паведаміў міністр унутраных спраў Ігар Шуневіч, інфармуе БЕЛТА. Лукашэнка падтрымаў зрабіць больш жорсткай адказнасць для п'яных за рулём. "Алкашам месца за рулём няма!", — заявіў ён.
Пакет прапаноў МУС рыхтуе да нарады кіраўніка дзяржавы з сілавікамі, дакладная дата якой пакуль невядомая. Сярод іх ёсць прапанова зрабіць больш жорсткай адказнасць для кіроўцаў, якія дзясяткі разоў на год парушаюць ПДР. Мяркуецца, што гэта выключыла б магчымасці здзяйснення цяжкіх злачынстваў на дарогах краіны.
"Мы прапануем увесці бальную сістэму рэагавання на парушэнні ў дачыненні такіх грамадзян з перспектывай часовага пазбаўлення іх магчымасці кіраваць транспартнымі сродкамі, — кажа Шуневіч. — ...Бальная сістэма працуе дастаткова проста: за пэўныя віды правапарушэнняў у галіне дарожнай бяспекі будуць налічвацца балы, і, калі грамадзянін будзе набіраць пэўную колькасць балаў за гэтыя правапарушэнні, ён будзе пазбаўляцца права на кіраванне транспартным сродкам на пэўны час".
