Мінскія ўлады паказалі, якім будзе басейн, які пабудуюць за кітайскія грошы
Мінскія ўлады паказалі, якім будзе "басейн міжнароднага стандарту", які пабудуюць за кітайскія грошы недалёка ад станцыі метро "Маладзёжная". Як паведамляе ў Telegram прэс-служба Мінгарвыканкама, плануецца, што працы пачнуцца ў другой палове гэтага года, а скончацца да канца 2023-га.
У архітэктурнай канцэпцыі спартыўнага аб'екта акцэнт зрабілі на нацыянальных сімвалах Беларусі. Галоўны фасад складаецца з пяці злучаных ромбаў, якія нагадваюць і беларускую, і кітайскую сімволіку. Архітэктары падкрэсліваюць. што басейн будзе сімвалізаваць нацыянальныя традыцыі беларусаў і дружбу беларускага і кітайскага народаў.
Паколькі басейн адпавядае міжнародным стандартам, у ім можна будзе праводзіць і нацыянальныя, і міжнародныя спаборніцтвы па плаванні, скачках у ваду, водным пола і сінхронным плаванні. Ён стане не толькі пляцоўкай для падрыхтоўкі спартсменаў, але і магчымасцю для гараджан займацца плаваннем.
Галоўны архітэктар Мінска Вольга Радчанка кажа, што вышыня будынка складзе каля 30 метраў, плошча — 40 тысяч квадратных метраў. Унутраная прастора будзе падзелена на зоны для спаборніцтваў, адпачынку, размінкі і трэніровак. У комплексе прадугледжана месца для асноўных спаборніцтваў, для скачкоў у ваду, для навучання плаванню дзяцей і г. д. Трыбуны змесцяць 6 тысяч заўзятараў.
Побач з басейнам пабудуюць спартыўны парк, у якім можна будзе пакатацца на скейтбордзе, арганізаваць прабежку ці нават пазагараць на пляжы.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
