Мінская міліцыя падключылася да пошуку сабакі, якога скралі каля ліцэя БДУ

Мінская міліцыя падключылася да пошуку сабакі, якога скралі каля ліцэя БДУ. У апошнія дні фота хаскі па мянушцы Аса актыўна распаўсюджваецца ў сацыяльных сетках. 11 лістапада гаспадар на некалькі гадзін пакінуў яе каля навучальнай установы на Ульянаўскай вуліцы, прывязаў да плоту. Калі вярнуўся, сабакі не было. Як інфармуе афіцыйная прадстаўніца Ленінскага РУУС Таццяна Кавалёва, у той жа дзень мужчына звярнуўся з заявай да праваахоўнікаў. Участковы інспектар праводзіць праверку.

Не выключаецца, што хаскі вывезлі ў іншы раён сталіцы ці ўвогуле за яе межы.