Мінская дзевяцікласніца загінула, скокнуўшы з высотнага дома
Упраўленне Следчага камітэта па Мінску расследуе трагічную гібель 14-гадовай навучэнкі сталічнай гімназіі. Цела дзевяцікласніцы з прыкметамі падзення з вышыні знайшлі ўдзень 31 студзеня каля жылога дома ў Савецкім раёне Мінску. Як паведамляе афіцыйная прадстаўніца Следчага камітэта Юлія Ганчарова, дом размешчаны каля ўстановы адукацыі.
Следчыя ўжо завяршылі агляд месца здарэння. Па факце гібелі дзяўчыны пачалі крымінальную справу за давядзенне да самагубства.
Для высвятлення ўсіх абставінаў здарэння следчыя апытваюць сваякоў, суседзяў, аднакласнікаў і настаўнікаў гімназіі.
