Межы пакуль адкрытыя для беларусаў, але ўжо закрытыя для афганак — #ІхНоравы

Талібы забараняюць жанчынам падарожнічаць у адзіночку — яны могуць выехаць за мяжу толькі ў суправаджэнні сваяка-мужчыны. Але сярод будучых студэнтак, якія спрабавалі паляцець у Дубай, былі і дзяўчаты, якіх суправаджалі сваякі. І ўсё адно чыноўнікі Міністэрства заганы і цноты знялі іх з самалёта.

Талібы пакуль нічога не растлумачылі — ні сусветнай грамадскасці, якая ўжо выказвае заклапочанасць, ні самім студэнткам, якія губляюць апошнюю надзею на новае жыццё.

Лёс Трампа ў руках 12-ці простых грамадзян

Гэта загаловак у свежай New York Times. Дональд Трамп праходзіць абвінавачаным у чатырох судовых працэсах. І гэта кідае выклік усёй амерыканскай судовай сістэме. Ці будуць ЗША давяраць суду прысяжных пасля суда над Трампам?

Раней, паводле апытання, 58 адсоткаў амерыканцаў давяралі прысяжным. І пры гэтым большасць з іх — дэмакраты, рэспубліканцы і беспартыйныя — сказалі, што не вераць у магчымасць суда прызначыць для гэтай справы бесстаронніх прысяжных.

А калі амерыканцаў спыталі, ці хацелі б яны засядаць сярод прысяжных у справе Трампа, больш за палову сказала, што адмовілася б ад такой прапановы.

Калі збіраецеся сачыць за гэтымі справамі, рэкамендуем спачатку паглядзець пару серыялаў пра амерыканскую судовую сістэму. Тады суд над Трампам вы зможаце ўспрымаць як новы сезон, скажам, "Добрай барацьбы".

Хто любіць суддзяў-абаронцаў

Індыец, бацька траіх дзяцей Рамалінгам Муруган працаваў у Сінгапуры. Яго і іншых працоўных-мігрантаў селяць звычайна ў інтэрнаты, размешчаныя на ўскраіне горада, а на працу возяць у перапоўненых грузавіках. Падчас адной з такіх паездак індыец зваліўся з кузава і зламаў нагу.

Ён падаў у суд на сваіх працадаўцаў, абвінаваціў іх у халатнасці — і выйграў справу. Мы расказваем пра гэта, бо рашэнне на карысць працоўнага ў такой справе — рэдкасць для Сінгапура.

У сваёй позве індыец напісаў, што кампанія не змагла стварыць або забяспечыць захаванне бяспечнай сістэмы транспарту для яго і іншых работнікаў. Прадстаўнікі кампаніі заявілі, што няшчасны выпадак быў звязаны нібыта з неасцярожнасцю самога рабочага.

Але суддзя вынесла рашэнне на карысць індыйца і заявіў, што кампанія відавочна "парушыла свае абавязкі".

Сінгапур, адна з самых багатых і развітых краін свету, на працягу дзесяцігоддзяў выкарыстоўвае танную працоўную сілу працоўных мігрантаў, расказвае CNN. Рабочыя з Бангладэш, Кітая і В'етнама бяруцца за цяжкую і часцяком небяспечную працу ў будаўніцтве і марской галіны. Яны працуюць часта ў экстрэмальных умовах надвор'я і не атрымліваюць нават мінімальнага заробку.