Лукашэнка заклікаў Нацбанк перастаць "жартаваць і гуляць у дэмакратыю"
У будучым годзе ў нашай краіне не павінна быць новых узрушэнняў, заявіў кіраўнік дзяржавы.
Аляксандр Лукашэнка гатовы прадаставіць Нацыянальнаму банку Беларусі дадатковыя паўнамоцтвы. Для таго, каб эфектыўна кантраляваць банкаўскую сістэму.
"Вы павінны кіраваць усімі банкамі ў краіне так, як вы лічыце патрэбным дзеля вырашэння тых задачаў, якія стаяць перад Нацыянальным банкам... Хопіць песціцца, жартаваць і гуляць у дэмакратыю", — цытуе словы Аляксандра Лукашэнкі РІА "Новости".
Кіраўнік Беларусі папярэдзіў, што краіна не павінна атрымаць новых узрушэнняў. Паводле яго слоў, "дзяржаўныя інтарэсы павінны быць вышэйшыя за карпаратыўныя". "А калі хтосьці з банкаў не згодны працаваць па гэтых правілах — прымайце меры. У вас усё ў руках — дзейнічайце!", — сказаў Лукашэнка, прадстаўляючы новага старшыню праўлення Нацбанка Паўла Калавура.
Таксама кіраўнік дзяржавы запатрабаваў навесці парадак на фінансавым рынку. Лукашэнка адзначыў, што стратэгічная задача Нацбанка — умацаваць давер людзей і прадпрыемстваў да беларускага рубля.
Фота: ria.ru