Лукашэнка: Прапановы МВФ будзем рэалізоўваць, як бы ні было складана
Беларусь і надалей не будзе даваць невыканальных абяцанняў заходнім партнёрам. Такую заяву ў панядзелак зрабіў Аляксандр Лукашэнка, прымаючы з дакладам міністра замежных спраў Уладзіміра Макея.
Кіраўнік дзяржавы гаварыў, што наша краіна заўсёды шчырая на міжнароднай арэне са сваімі партнёрамі, выконвае абяцанні, як бы ні было складана і цяжка. Лукашэнка згадаў Міжнародны валютны фонд. Як вядома, улады Беларусі спадзяюцца атрымаць ад яго так неабходны крэдыт — 3 млрд долараў. Аднак сёння Аляксандр Лукашэнка без энтузіязму адзначыў: "Калі пойдуць на падтрымку Беларусі, пра якую мы запытвалі, — дзякуй, не пойдуць, значыць, не пойдуць... Але весці перамовы з імі трэба з улікам нашых пазіцый, таго, што мы таксама ім абяцалі".
У чарговы раз кіраўнік дзяржавы сказаў, што МВФ не ўносіць незразумелых ці непатрэбных прапановаў. "Мы будзем рэалізоўваць іх прапановы, як бы ні было складана", — цытуе словы Лукашэнкі БЕЛТА.
Як паведамляла Еўрарадыё, сёння Аляксандр Лукашэнка паведаміў, што кіраўніцтва Расіі падтрымае эканоміку Беларусі. Ці гэта будзе крэдыт, ці нейкія іншыя формы дапамогі, ён не ўдакладніў.
