Лукашэнка: будучы прэзідэнт Беларусі ўжо нарадзіўся, але гэта не артыст

26 верасня падчас сустрэчы ў Мінску з украінскімі журналістамі Аляксандр Лукашэнка ацаніў шанцы на перамогу ў нашай краіне на прэзідэнцкіх выбарах несістэмнага кандыдата. Гэта тое, што адбылося ва Украіне, дзе раптоўна вялізную народную падтрымку атрымаў Уладзімір Зяленскі.

"У нас гэта немагчыма, прабачце за нясціпласць, — цытуе словы Лукашэнкі sb.by. — У нас зусім іншы падыход. І ў нас некалькі іншая рэчаіснасць".

Аляксандр Лукашэнка нагадаў, што ў Беларусі "сацыяльна арыентаваная эканоміка", адсутнасць алігархічных кланаў. Да таго ж беларусы і ўкраінцы — "гэта розныя людзі", — сказаў ён. Па словах Лукашэнкі, украінцы рызвычаіліся "самі за сябе адказваць і забяспечыць сваю сям'ю". А вось беларусы ўсё яшчэ спадзяюцца на дзяржаву: "І яшчэ калі дапамагаеш, некаторыя "бухцець" пачынаюць, што так, што не так".

Лукашэнка перакананы, што "ты не станеш прэзідэнтам, калі ты ім не нарадзіўся". "Тое, што будучы прэзідэнт нарадзіўся — гэта сто адсоткаў, — гаварыў беларускі кіраўнік. — ...Я нікога не прыглядаю, гэта не трэба хадзіць з біноклем і думаць — а хто, а хто?".

Аляксандр Лукашэнка заявіў, што будзе кіраваць дзяржавай да таго часу, пакуль "ёсць здароўе" і пакуль яму давяраюць людзі.

Прэзідэнцкія выбары ў Беларусі пройдуць у 2020 годзе.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.