КДБ затрымаў дырэктара ААТ "Ружаны-Агра" пры атрыманні хабару
Кіраўнік сельскагаспадарчага прадпрыемства меўся атрымаць "адкат" у 50 тысяч долараў.
Як паведамляе БелаПАН са спасылкай на прэс-службу КДБ, затрымалі яго пры атрыманні 25 тысяч долараў. Гэта была частка незаконнага грашовага ўзнагароджання за дапамогу ў набыцці па завышаным кошце ва ўласнасць ААТ аб'екта нерухомасці, які належыць адной з камерцыйных структур Гродзенскай вобласці.
Падчас ператрусу па месцы жыхарства службовай асобы знайшлі і канфіскавалі 232 тысячы долараў і 10 тысяч еўра.
Непасрэдна пры перадачы грошай быў затрыманы пасярэднік. Неўзабаве затрымалі і таго, хто даваў хабар — заснавальніка фірмы, якая прадавала аб'ект нерухомасці.
Затрыманых узялі пад варту. На іх пачалі крымінальную справу.
Фота — torange.ru