Хацкевіч: Пасля такога дагляду на стадыёне больш бы я на футбол не пайшоў

Падчас прэс-канферэнцыі рулявы нацыянальнай зборнай па футболе Аляксандр Хацкевіч расказаў, чаму не самая змяшчальная “Барысаў-Арэна” можа быць паўпустой падчас гульні галоўнай каманды краіны. 

“Я не думаю, што гэта кажа пра культуру заўзятараў. Ёсць іншыя фактары: як дабрацца да стадыёна, пачатак гульні ў 21.45... А назаўтра многім трэба працаваць. Ад нас таксама не залежыць, у колькі ставіць матч, ёсць рэгламент, — абараняе Хацкевіч на першы погляд не самых патрыятычных беларускіх заўзятараў. —  Але калі чалавек прыйшоў на стадыён, то ён павінен па-сапраўднаму падтрымліваць зборную”.

На пытанне Еўрарадыё галоўны трэнер параўнаў запаўняльнасць стадыёнаў у Беларусі і Украіне.

“Там краіна аб’ядналася. І на матчах нацыянальнай зборнай, дзе б яна ні гуляла і як бы яна ні гуляла, заўсёды практычна поўны стадыён”, — канстатуе Хацкевіч. 

Прэтэнзію галоўны трэнер выказаў і наконт спецназаўскага дагляду на беларускіх арэнах. Дарэчы, самога Хацкевіча апошнім часам пры ўваходзе на стадыён не абмацваюць і не шукаюць пад яго вопраткай выбухоўку ды нажы.  

“Але гады тры-чатыры таму быў на “Дынама” падчас гульні зборнай Беларусі, — згадвае трэнер. — Мне прыйшлося прайсці дагляд. Калі шчыра, больш бы я на футбол не пайшоў. Я ішоў з сябрамі, якія прыехалі з іншай краіны. І яны таксама за галаву хапаліся”.