Экс-палітвязня Змітра Дашкевіча асудзілі на трое сутак
Яго абвінавацілі ў непадпарадкаванні законным патрабаванням супрацоўнікаў міліцыі.
Пра гэта Еўрарадыё распавёў журналіст Барыс Гарэцкі, які здолеў трапіць на працэс у Цэнтральны раённы суд Мінска.
Гарэцкі: "Суд працягваўся літаральна пяць хвілінаў. Выступілі два сведкі — супрацоўнікі міліцыі. Яны заявілі, быццам Дашкевіч не падпарадкоўваўся іх законным патрабаванням — нібыта сядаў на зямлю, упіраўся... Ну, звычайны "пакет"... На гэта Дашкевіч ясна сказаў, што ён нічога такога не рабіў, заклікаў іх не ўдзельнічаць у такіх палітычных працэсах і ўвогуле звальняцца з міліцыі, каб не ганьбіць уласнае імя і ўласнае жыццё".
Як паведамляла Еўрарадыё, Змітра Дашкевіча затрымалі ў сераду ўдзень. Разам з паплечнікамі ён збіраў подпісы за вяртанне вуліцы Леніна старой назвы — Францішканская.
На волю Дашкевіч выйдзе 9 лістапада.
Фота — svaboda.org
