Дзе патусіць на выхадных 13-15 верасня, раіць Павел Юрцэвіч

Кіраўнік студыі гуказапісу “ОСМОС” Павел Юрцэвіч знакаміты тусоўшчык у рок-асяроддзі. Ён наведвае ўсе канцэрты, тусоўкі, оўпэн-эйры, творчыя вечары і проста сустрэчы, якія адбываюцца ў кампаніі стваральнікаў пазаэстраднай і “фарматнай” музыкі. Але і Павел не супраць зазірнуць і на “гламурныя” вечарыны, каб, так бы мовіць, “зарадзіцца энергіяй на параўнанні”.

“Трэба на ўсё заўсёды глядзець з розных бакоў, — тлумачыць нечаканую пазіцыю кіраўнік “ОСМОС”. — Не ведаю, чаму пасля канцэрта, напрыклад, “Аукцыона” нельга пайсці і паглядзець якое-небудзь “распушчанае” гламурнае шоў. Паглядзець, як весяляцца іншыя людзі. У Мінску дастаткова шмат іншага, і гэта таксама тусовачнае жыццё. Мне цікава глядзець што там адбываецца і час ад часу, не часта, туды акунацца”.

Менавіта таму ў Паўла не бывае аднаго мерапрыемства на вечар, ён любіць ладзіць марафон па імпрэзах. І прапануе яго пачынаць ужо ў пятніцу, адразу пасля працы. Стартаваць Юрцэвіч раіць у клубе “Цэнтр” на фестывалі “Рок па вакацыях”. Але там да канца заставацца не варта, бо ў той жа час у клубе Re:Public выступае адэскі гурт Flёur. Але і гэта не ўсё! Закончыць пятніцу Павел плануе ў… Dozari! на танцавальным fashion-шоў дызайнера Яўгеніі Озмы “Strana Ozz”.

“Суботу я б пачаў з паходу  ў кіно на фільм “Два ствалы”, — працягвае “марафон” Павел Юрцэвіч. — Калі што, гэта не парнуха! У Галерэі “кулька” цяпер праходзяць дзве нядрэнныя выставы… так кажуць. Таму пасля кіно — нядрэнны варыянт прагуляцца туды. А бліжэй да вечара ў клубе TNT будзе Old Audio Fest, дзе збяруцца аматары старой аўдыётэхнікі. Паміж імі пройдуць спаборніцтвы на самы гучны, самы чысты па гучанні прайгравальнік і г.д. Мне заўсёды тэхніка цікавая, я сачу за навінкамі, рэгулярна заходжу ў крамы і г.д. Не сказаць, каб гэта быў феціш, але вельмі блізка да гэтага”.

Далей Павел прапануе адарвацца ад усяго і забегчы на канцэрт Napalm Death у Re:Public. Маўляў, “увесь канцэрт быць неабавязкова, але ўзгадаць музыку юнацтва, якую акурат і слухалі на апаратуры Old Audio Fest, вельмі хацелася б”. А пасля металу ад брытанскага гурта Юрцэвіч прапануе паехаць у “Графіці” на начную вечарыну “All Summer Parties з Пагодзінай і Грудзько” і адарвацца ўжо пад больш сучасныя і мэйн-стрымавыя трэкі.

“У нядзелю ад 13-14 гадзінаў ужо трэба быць на вуліцы Карла Маркса, — апошні дзень марафону Паша вырашыў пачаць шпацырам. — Там будзе “Першы мінскі форум вулічных тэатраў”. Неверагодная колькасць труп будзе паказваць свае міні-спектаклі. Там можна проста прагульвацца і глядзець. Далей безумоўна раю рушыць у ДК “МАЗ” на канцэрт піцерскага гурта “Аукцыон”. Ну і вечарыны! Тут у мяне два варыянты: Millennium ці Blackhall bar! Усё той жа гламур, але…”.

Калі вечарыны ўсё ж камусьці не пасуюць, а дома не сядзіцца, то кіраўнік студыі “ОСМОС” прапануе праводзіць кожную ноч выходных 13-15 верасня на летняй тэрасе клуба Mojito. Штоноч там будуць паказваць нейкі фільм.

Так выглядаюць звычайныя выходныя Пашы Юрцэвіча! Паспрабуйце ўгнацца!