Бюджэт-2014: больш грошай на міліцыю і КДБ, менш — на адукацыю і культуру

12/12/2013 - 15:37

12 снежня Палата прадстаўнікоў у першым чытанні прыняла бюджэт на 2014 год. Абмеркаванне дакумента ў 700 старонак заняло менш за 2 гадзіны. А за некалькі гадзінаў да гэтага праект дакумента атрымала Еўрарадыё.

Бюджэт на 2014 год плануецца бездэфіцытным. Выдаткі супадаюць з прыбыткамі і складаюць 128,5 трыльёна — гэта на 7,2 трыльёна больш, чым было запланавана летась. Параўнаем выдаткі на найбольш цікавыя артыкулы бюджэта-2014 з мінулымі бюджэтамі.

Усе лічбы — у тысячах рублёў.

Куды вылучаюцца грошы?	2012	2013	2014
Камітэт дзяржаўнай бяспекі	509 686 982,0	753 118 683,8	928 706 224,0
Міністэрства ўнутраных спраў	2 741 509 602,6	3 931 625 733,7	4 780 888 629,0
Ахова здароўя	3 791 184 816,0	5 348 468 453,7	5 745 927 041,0
Адукацыя	4 617 382 766,0	6 636 608 445,8	6 599 295 176,0
Культура	648 788 329,0	872 129 204,6	718 944 970,0
СМІ	491 678 422,0	669 206 189,2	676 113 933,0
— з іх тэлебачанне і радыёвяшчанне	366 270 390,0	514 674 681,3	548 294 714,0
Антарктычная праграма	2 718 321,0	4 729 408,0	6 525 676,0
Дзяржпраграма “Замкі Беларусі”	—	2 500 000,0	1 424 500,0
Фундаментальныя навуковыя даследаванні	470 560 000,0	760 663 000,0	784 931 123,0
Абслугоўванне знешняй дзяржпазыкі	5 937 420 000,0	7 039 810 450,	7 695 675 400,0
“Дажынкі”	81 200 000	169 680 000	248 500 000

Фінансаванне КДБ і МУС павялічваецца на 23% і на 21% адпаведна. Прычым КДБ за два гады “падаражэў” беларусам амаль удвая! Цікава, чаму: ніякіх дэвальвацый ні ў 2012, ні ў 2013 годзе не было…

Пашанцавала і дзяржаўным журналістам. Выдаткі на аплату іх працы не скараціліся, а нават крыху ўзраслі. Што праўда, ільвіную долю ад 676 млрд забіраюць тэлевізійшчыкі.

Амаль на два мільярды больш, чым летась, Беларусь укладзе ў пакарэнне Антарктыды. Было 4,72 млрд, стала 6,52! А вось іншай дзяржпраграме — “Замкі Беларусі” — не пашанцавала: у 2014 годзе яна будзе скарочаная на 1 мільярд рублёў: было 2,5 млрд, стала 1,42 мільярда. Затое амаль 2 мільярда на "Слуцкія паясы". Выдаткі на культуру ў бюджэце-2014 скарачаюцца аж на 150 млрд!

Скарачэнне, хаця і нязначнае, закранула адукацыю. На яе ў бюджэце на наступны год прадугледжваецца 6,599 млрд замест 6,636 млрд летась.

Перад другім чытаннем (якое пройдзе ці ў наступны панядзелак, ці 20 снежня, падчас заключнага пасяджэння трэцяй сесіі) Палата прадстаўнікоў можа прапанаваць Мінфіну “падправіць” бюджэт. Напрыклад, адзін з дэпутатаў прапанаваў усё ж не ўводзіць “аўтамабільны” збор, а сродкі на рамонт дарог атрымаць ад больш імклівага падвышэння коштаў на паліва. Маўляў, хто ездзіць больш — той няхай і плаціць больш.

Гэтыя і іншыя папраўкі могуць паўплываць як на прыбыткі бюджэта-2014 увогуле, так і на асобныя артыкулы. Верагодна, сёлетні бюджэт будзе падпісаны Аляксандрам Лукашэнкам у апошнія дні года, як і бюджэт-2012 — наступны пасля цяжкага, “дэвальвацыйнага” 2011 года.

Фото: dengi.onliner.by.