БТ не можа дамовіцца з венграмі на паказ гульні “Дэбрэцэн” — БАТЭ
Перамовы не завершаныя, нягледзячы на тое, што да гульні застаўся ўсяго дзень.
“Мы робім унікальны падарунак беларускаму гледачу. Дзе вы ўбачыце Алімпійскія гульні, Лігу чэмпіёнаў, чэмпіянат свету па футболе або КХЛ на бясплатным канале ў тым аб'ёме, у якім паказвае Белтэлерадыёкампанія? Не ведаю, якая краіна можа пахваліцца такім. Спорт — дарагое задавальненне”, — расказвае ў інтэрв’ю сайту goals.by дырэктар спартыўнага тэлеканала “Беларусь 5” Павел Булацкі.
Канал ствараюць восенню 2013, справу падганяе асабіста кіраўнік краіны Аляксандр Лукашэнка. Але, як выявілася, нават існаванне ў адносна невялікай Беларусі адмысловага спартыўнага тэлеканала не гарантуе нам трансляцый матчаў сваіх каманд. Прынамсі, замест гульні важнага трэцяга кваліфікацыйнага раўнду Лігі чэмпіёнаў паміж венгерскім “Дэбрэцэнам” і барысаўскім БАТЭ “Беларусь 5” плануе паказаць фінальны матч тэніснага турніру ва Уімблдоне. Прычым у запісе, бо турнір… даўно скончыўся.
Няма гульні паміж барысаўчанамі і венграмі і ў праграмах іншых каналаў. Напрыклад, схільны да спартыўных трансляцый “Беларусь 2” вечарам аўторка плануе паказваць расійскі серыял “Саша Таня”. Чаму так, Еўрарадыё не могуць расказаць нават супрацоўнікі каналаў. Гульні БАТЭ ў “Лізе чэмпіёнаў” — гэта самыя рэйтынгавыя трансляцыі беларускага тэлебачання апошніх гадоў. Як і іншыя спартовыя відовішчы.
Праўда, без футбола ўсё ж не застанемся. У чацвер беларускае тэлебачанне плануе паказаць гульню "Дынама" - "Клуж" кваліфікацыі Лігі Еўропы.
У прэс-службе “Белтэлерадыёкампаніі” Еўрарадыё тлумачаць, што перамовы з венгерскім бокам наконт трансляцыі ідуць. І нават надзея на тое, што беларусы ўсё ж пабачаць гульню, яшчэ ёсць.
“Яшчэ ідуць перамовы — нічога не вядома пакуль. Вы калі захочаце ўдакладніць, то звяртайцеся пазней, я не ведаю… Магчыма, заўтра”.
Матч у Дэбрэцэне тым часам — ці не самы важны для Беларусі ў сёлетніх еўракубках. Калі барысаўчане змогуць выйграць у Венгрыі, то 5 жніўня ўтрымаць перавагу па суме дзвюх сустрэч у родным Барысаве будзе нашмат прасцей. І тады можна рыхтавацца да раунла плэй-оф. Але шанцаў пабачыць гульню “Дэбрэцэн” — БАТЭ хаця б на тэлеэкране, паводле інфармацыі Еўрарадыё, у беларусаў зусім няшмат.