Беларусь зноў выплаціла па еўрааблігацыях рублі замест долараў
Грошы / Еўрарадыё
Міністэрства фінансаў Беларусі чарговы раз выплаціла працэнтны даход па еўрааблігацыях Belarus-2027 рублямі замест долараў, паведамляе прэс-служба ведамства.
Плацеж у эквіваленце 22,9 мільёна долараў быў праведзены 29 снежня 2023 года. Сродкі, як і раней, былі пералічаныя на асобны банкаўскі рахунак у "Беларусбанку" ў нацыянальнай валюце.
28 чэрвеня 2022 года Саўмін і Нацбанк вырашылі выплочваць запазычанасці па дзяржаўных каштоўных паперах на знешніх фінансавых рынках у беларускіх рублях паводле курсу Нацбанка на дату плацяжу. З таго часу Беларусь пералічвае плацяжы па даўгах у рублях на спецрахунак у "Беларусбанку". Кампаніі Citigroup і Citibank адмовіліся выступаць агентамі ў дачыненні да беларускіх еўрабондаў.
Міжнародныя рэйтынгавыя агенцтвы Fitch Ratings і Moody’s панізілі крэдытны рэйтынг Беларусі. Першае з іх заявіла пра набліжэнне непазбежнага дэфолту, а другое назвала дэфолтам наяўную сітуацыю.
