Аліна Талай перамагла на чэмпіянаце Еўропы (фота, відэа)

Напрыканцы дня ў пятніцу 6 сакавіка Аліна Талай упэўнена ўхапіла залаты медаль чэмпіяната Еўропы, які праходзіць у Празе. Беларуска пабіла нацыянальны рэкорд 1990 года, з вынікам 7,85 секунд.

Нагадаем, што Аліна з’яўляецца адной з самых патрыятычных беларускіх спартсменак, часта ўдзельнічае ў праектах па раскрутцы беларускай мовы.

На чэмпіянаце Еўропы Аліна сутыкнулася са складанасцямі. Час кваліфікацыі і фіналу вызначылі такім чынам, што гэта не вельмі пасавала яе біялагічнаму гадзінніку. 

“Ужо перад фіналам я разумела, што яшчэ трошкі і энергія пачне згасаць, таму пастаралася максімальна сабрацца і годна прадставіць сябе і сваю краіну”, — выказалася лёгкаатлетка пасля старту для сайта Беларускай федэрацыі лёгкай атлетыкі і ўсіх сваіх фанатаў.

“Пасля гэтага старту планую тыдзень адпачыць, а потым зноў трэніроўкі. Буду рыхтавацца да чэмпіянату свету”,  — паведамляе Аліна пра свае планы Еўрарадыё.

“Можа, у Празе з вамі здарылася нешта цікавае, пра што не ведаюць СМІ?”

Аліна Талай: “Самае цікавае для мяне здарыцца сёння ўвечары (7 сакавіка — Еўрарадыё), калі адбудзецца ўзнагароджванне”. 

Да гэтага залатога старту Аліна рыхтавалася разам з аўстрыйскім трэнерам Філіпам Унфрыдам. Пасля перамогі спецыяліст выставіў у сацыяльныя сеткі фотаздымак разам з новай чэмпіёнкай Еўропы і падпісаў яго “Цудоўная праца, Аліна!! 7,85”.

Талай ужо была чэмпіёнкай Еўропы ў памяшканнях і перад пачаткам зімняга сезону намякала, што імкнецца да медалёў на самых прэстыжных стартах.

Фіналы ў асноўных дысцыплінах пражскага чэмпіянату пройдуць 7 і 8 сакавіка. Трэнерскі штаб беларусаў спадзяецца на кідальныя дысцыпліны, скокі ўдаўжыню і бег на доўгія дыстанцыі.