Аб'яднанне гомельскіх пашукавікоў ліквідавалі за "шкоду дзяржаўным інтарэсам"

Гомельскі абласны суд ліквідаваў пашуковае аб'яднанне "Памяць Айчыны". Пазоў супраць арганізацыі выставіла галоўнае ўпраўлення юстыцыі Гомельскага аблвыканкама.

Сёлета ў сакавіку кіраўнік аб'яднання Ігар Свірыдзенка быў арыштаваны на 10 сутак паводле артыкула аб распаўсюдзе "экстрэмісцкіх матэрыялаў".

Абласная пракуратура занялася комплекснай праверкай "Памяці Айчыны". Яна выявіла, што "Савет таварыства і яго старшыня не прынялі меры па належным прыёме ў чальцы грамадскага аб'яднання і забеспячэнні выплаты членскіх унёскаў".

Таксама пракуратура заявіла, што Свірыдзенка прапагандаваў "сярод чальцоў таварыства і іншых асоб антыдзяржаўныя погляды". Прэтэнзіі пракуратуры датычацца пахаванняў у Чонкаўскім лесе пад Гомелем. Свірыдзенка, як вынікае, казаў, што там ляжаць ахвяры сталінскіх рэпрэсій — гэта было выяўлена і даказана ў 90-я гады. Але цяпер пракуратура сцвярджае, што там знаходзяцца ахвяры нацысцкіх рэпрэсій: Чонкаўскі лес фігуруе ў "справе аб генацыдзе беларускага народа".

Чыноўнікі юстыцыі вырашылі, што дзейнасць пашуковага таварыства "прычыніла істотную шкоду дзяржаўным і грамадскім інтарэсам". Суд з імі пагадзіўся і ліквідаваў "Памяць Айчыны".

Аб'яднанне займалася пошукам парэштак ахвяр Другой сусветнай вайны і сталінскіх рэпрэсій. За час сваё дзейнасці арганізацыя выявіла некалькі соцень загінулых у Другой сусветнай вайне і мірных грамадзян. Яшчэ ў 2022 годзе дзяржаўныя СМІ пісалі пра "Памяць Айчыны" пазітыўна.