Абаронцу "Мінска" Сяргея Сасноўскага дыскваліфікавалі на два матчы
Яго пакаралі за выдаленне ў канцоўцы гасцявога матча кваліфікацыі футбольнай Лігі Еўропы супраць шатландскага "Сэнт-Джонстана", інфармуе "Прессбол".
Нагадаем, "Мінск" выйграў той паядынак па пенальці. Сасноўскі пабачыў перад сабой чырвоную картку ўжо пасля заканчэння 120 хвілін гульні. Як казаў пасля брамнік Уладзімір Бушма, у Сасноўскага "выйшлі эмоцыі" пасля свістка арбітра — ён, нібыта, паказаў нейкі жэст гульцу гаспадароў поля, за што і быў пакараны.
Галоўны трэнер "Мінска" Вадзім Скрыпчанка гаварыў, што клуб скантактуецца з УЕФА, патлумачыць той інцыдэнт і, магчыма, дыскваліфікацыя абмяжуецца адным матчам. Аднак выйшла інакш.
Такім чынам, у абодвух матчах (22 жніўня ў Гродне і 29-га — у гасцях) за выхад у групавы этап Лігі Еўропы з бельгійскім клубам "Стандард Льеж" ФК "Мінск" згуляе без Сяргей Сасноўскага.
На здымку: Каманда "Мінск". Сяргей Сасноўскі стаіць першы злева. Фота — ФК "Мінск"