Затрыманні ў Гомельскай вобласці — да сілавікоў трапіла не менш за 10 чалавек
Затрыманне, ілюстрацыйнае фота / AFP
Не менш за 10 чалавек было затрымана ў Гомельскай вобласці паводле палітычных матываў. Відэасправаздачу "аб праведзенай працы" сілавікі апублікавалі ў сваім тг-канале. Затрыманыя кажуць на відэа, што трапілі ў міліцыю праз тое, што былі падпісаныя на "экстрэмісцкія" каналы, рабілі ахвяраванні або былі на акцыях пратэсту.
Аднаго з маладых хлопцаў прымусілі сказаць, што ён пазнаёміўся ў камп'ютарнай гульні з украінцамі і "пад іх уплывам пачаў абражаць Расію і прэзідэнта Беларусі". Пры гэтым абліччы траіх затрыманых былі размытыя.
Паводле сілавікоў, яны вядуць "пастаянную працу" ў Брагіне, Ельску, Лоеве, Хойніках, Нароўлі і іншых гарадах вобласці. Што тычыцца далейшага лёсу затрыманых, то частка з іх, гаворыцца ў паведамленні, будзе адказваць у рамках крымінальнага або адміністрацыйнага кодэксаў, частку абяцалі адпусціць пасля "папярэджання і прафілактычнай гутаркі".
