50 затрыманых каля КДБ: людзей вялі ва ўнутраны двор і садзілі ў аўтазак

28/07/2020 - 19:40

Каля 50 чалавек былі затрыманыя ў Мінску каля Камітэта дзяржбяспекі 28 ліпеня, паведамляе праваабарончы сайт "Вясна".

Напярэдадні Марыя Калеснікава, каардынатарка штаба Віктара Бабарыкі, заклікала ісці падаваць паручальніцтвы за Віктара і яго сына Эдуарда, каб ім змянілі меру стрымання.

Каля 16:00 прадстаўнікі штаба Бабарыкі прыйшлі ў прыёмную КДБ з адвакатам і падалі свае паручальніцтвы. Раней такія ж паручальніцтвы перадалі нобелеўская лаўрэатка пісьменніца Святлана Алексіевіч і дызайнер Уладзімір Цэслер.

А іншым пашанцавала не настолькі. Амапаўцы затрымлівалі людзей, якія прыйшлі падаваць паручальніцтвы, а таксама журналістаў, якія асвятлялі акцыю.

Па звестках праваабаронцаў, затрыманых звозілі ў РУУСы Ленінскага, Кастрычніцкага і Маскоўскага раёнаў. Амаль усіх вызвалілі без складання пратаколаў. Праваабаронцы ведаюць толькі пра два адміністрацыйныя пратаколы.

Паводле інфармацыі БАЖ, былі затрыманыя наступныя журналісты: Алена Талкачова (TUT.BY), Кацярына Андрэева (Белсат), Антон Сяліцкі, Галіна Абакунчык (Белсат), Ігар Ілляш, Наталля Фядосенка (фотакарэспандэнтка ТАСС у Мінску), Анастасія Кахановіч, Максім Гарчанок, Таццяна Капітонава, Захар Шчарбакоў (БелаПАН), Сяргей Сацюк-Грабоўскі (БелаПАН). Няма звестак пра Яўгенію Сугак (галоўрэдка The Village Беларусь) — яна перастала выходзіць на сувязь пасля таго, як пайшла падаваць заяву ў КДБ.

Людзей, якія стаялі на вуліцы ў чарзе да КДБ міліцыянты папярэдзілі, што будуць лічыць чаргу несанкцыянаванй акцыяй. Неўзабаве семярых чалавек з чаргі затрымалі.

Ёсць звесткі, што ў КДБ затрымлівалі і людзей, якія прыйшлі з паручальніцтвамі. У каментары Радыё "Свабода" Кастусь Касцян распавёў, як яго і іншых людзей з паручальніцтвамі вывелі ва ўнутраны дворык КДБ і пасадзілі ў аўтазак. Іх завезлі ў пастарунак, узялі адбіткі пальцаў, тлумачэнні і адпусцілі. Хадайніцтвы за Бабарыку ў людзей не прынялі.

Паводле звестак "Вясны", толькі Арцёма Карнэса адправілі на ноч у ІЧУ на Акрэсціна.

Дарэчы, журналісты Еўрарадыё, якія вялі стрым з месца падзеяў, не бачылі, каб людзі, якія падавалі хадайніцтвы, выходзілі з КДБ. Пашанцавала толькі тром жанчынам, якія перад чарговым хапуном уцяклі ад амапаўцаў у прыёмную КДБ, хуценька пакінулі там хадайніцтвы і выйшлі.