Як ва Украіне сустракалі вызваленых з палону (фотарэпартаж)
27 снежня на Данбасе прайшоў першы за апошнія два гады вялікі абмен палоннымі. Як адзначае hromadske.ua, на падкантрольную афіцыйнаму Кіеву тэрыторыю вярнуліся 73 закладнікі. Украінскі бок перадаў так званым "ДНР" і "ЛНР" 233 чалавекі, хоць спачатку дамаўляліся пра абмен у фармаце 74 на 306.
Вызваленых украінцаў адправілі верталётамі ў Харкаў. Адтуль яны ўначы самалётам прыляцелі ў Кіеў, дзе на ваенным аэрадроме ў Барыспалі іх сустрэлі родныя і блізкія.
Сваякі палонных прыбылі ў аэрапорт яшчэ ўдзень, а самалёт з вызваленнымі ўкраінцамі прызямліўся толькі каля другой гадзіны ночы.
Сепаратысты аддалі 73 закладніка з 74 папярэдне абвешчаных: 57 чалавек з Данецка, 16 — з Луганска. У іх ліку былі 54 украінскія вайскоўцы, якія знаходзіліся ў палоне так званай "ДНР", пяць — "ЛНР". Астатнія 14 чалавек — грамадзянскія асобы. Адзіны чалавек, які адмовіўся вяртацца на падкантрольную Кіеву тэрыторыю, — жанчына. Яна лічылася ў спісах закладнікаў, якія ўтрымліваюцца ў "ДНР".
Такім чынам пасля абмену ў палоне баевікоў, па словах кіраўніка СБУ, застаюцца яшчэ 103 ўкраінцы.
Украінскі бок адмовіўся перадаваць на абмен усіх затрыманых грамадзян Расіі, уключаных у спісы прадстаўнікамі "ЛНР" і "ДНР".
Вызваленых з палону грамадзянскіх асоб пасля дастаўкі ў Кіеў павезлі ў лякарню "Феафанія", а вайскоўцаў — у цэнтральны ваенны шпіталь для медыцынскага абследавання.
