Вадалаз адгаварыў самагубцу скакаць у Свіслач: рака мелкая, можна зламаць ногі

Мінскі вадалаз Мікалай Мінькоўскі адгаварыў самагубцу скакаць у Свіслач. Здарэнне адбылося пасля 6-й гадзіны раніцы 2 ліпеня, калі ён на ровары е'хаў на працу. Вадалаз пабачыў, што на мосце праз Свіслач па вуліцы Багдановіча за парэнчамі стаяў мужчына, які відавочна збіраўся скокнуць уніз. Мінькоўскі загаварыў з ім, а сам незаўважна выклікаў міліцыю, паведамляе minsknews.by.

Патэнцыйны самагубца, якому каля 30 гадоў, быў усхваляваны, расказаў пра свае праблемы — у яго нядаўна памёр лепшы сябра. Гутарка працягвалася хвілін 15-20. Вадалаз адгаворваў мужчыну скакаць уніз: "у гэтым месцы рака мелкая, можна зламаць ногі", а пасля яшчэ дадуць штраф за хуліганства. Пакуль яны размаўлялі, прыехалі двое міліцыянераў. Праваахоўнікі падышлі ціха ззаду да мужчыны за парэнчамі і схапілі яго за плечы і рукі. Яго завезлі ў міліцыю для разбіральніцтва.

Мікалай Мінькоўскі здзіўляецца, што прахожыя, якіх было шмат, і рыбакі не звярталі на мужчыну на мосце ніякай увагі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.