Вы тут

Улады Беларусі агучылі контрсанкцыі: супраць тавараў, асобаў і авіяперавозчыкаў

У МЗС агучылі адказ "калектыўнаму Захаду" / twitter.com/BelarusMID

Улады Беларусі нарэшце агучылі контрсанкцыі. 6 снежня на сайце МЗС нашай краіны з'явілася заява "аб мерах Рэспублікі Беларусь у адказ на незаконны знешні санкцыйны ціск".

Вось чым улады Беларусі адкажуць на ўзмацненне санкцый з боку заходніх краін:

- імпартазамяшчэнне: будзе ўведзеная забарона на ўвоз тавараў з краінаў, якія падтрымліваюць санкцыі. Іх заменяць айчыннымі таварамі;

- абмежаванні для авіякампаній з краін ЕС і Вялікабрытаніі, якія падтрымліваюць санкцыі;

- пашырэнне спісу неўязных у Беларусь і Расію;

- "працяг рэалізацыю Саюзных праграм і ўзмацненне эканамічнай інтэграцыі з Расіяй";

- шэраг "іншых крокаў непублічнага характару".

Анансуецца прыняццё адпаведнай урадавай пастановы.

У канцы прэс-рэліза МЗС РБ ізноў намякае "калектыўнаму Захаду" на дыялог.

2 снежня новыя санкцыі супраць Беларусі ўвялі Еўрасаюз, ЗША і Вялікабрытанія. У пакет санкцый ЕС уключаныя 10 юрыдычных асоб і 17 фізічных, у пакет санкцый ЗША — 9 фізічных асоб, 12 арганізацый і 3 паветраныя судны, Вялікабрытанія ўвяла санкцыі супраць "Беларуськалія" і 8 грамадзян Беларусі. Гэта быў адказ на міграцыйны крызіс на межах ЕС, у арганізацыі якога абвінавачваюць улады Беларусі.

Тады прэм'ер-міністр Раман Галоўчанка паабяцаў пакет эканамічных санкцый супраць Захаду.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.