Украінская разведка: у Беларусі негалосна дазволілі кантрабанду цыгарэт
У Беларусі негалосна дазволілі кантрабанду санкцыйных тавараў, заяўляе Галоўнае ўпраўленне разведкі Мінабароны Украіны. Паведамляецца, што Памежнаму камітэту дадзена ўказанне не перашкаджаць вывазу кантрабандных цыгарэт праз межы з Польшчай, Літвой і Украінай.
"Такое рашэнне звязана з рэзкім пагаршэннем фінансавай сітуацыі ў краіне з-за накладзеных на рэжым Лукашэнкі санкцый з боку краін Захаду", — перакананыя ва ўкраінскай разведцы.
Украінскі бок мяркуе, што такім чынам беларускі рэжым спадзяецца часткова панізіць дэфіцыт паступленняў у бюджэт краіны за кошт максімальнага стымулявання кантрабанды.
"У першую чаргу — тытунёвых вырабаў мясцовых вытворцаў", — гаворыцца ў паведамленні.
Падобным чынам, адзначаюць разведчыкі, Беларусь часткова зможа забяспечыць уласны рынак санкцыйнымі групамі тавараў, якія раней не дастаўляліся ў краіну. Гэта запчасткі для аўтамабіляў, гаспадарчыя тавары і іншае.
Беларускі бок гэтую інфармацыю пакуль не каментаваў. Аднак вядома, што выяўленне кантрабандных беларускіх цыгарэт на межах з Літвой і Польшчай — звычайная з'ява ў апошні час.
