У Польшчы заклікаюць скасаваць пагадненне аб прававой дапамозе з Беларуссю
Амбудсмен Польшчы заклікае скасаваць пагадненне аб дапамозе беларускім уладам / pixabay.com
Польшча мусіць скасаваць пагадненне аб прававой дапамозе з Беларуссю ў сферы крымінальных спраў. Да гэтага заклікае ўпаўнаважаны па грамадзянскіх правах Польшчы Марцін Вёнцак, піша rp.pl. Пагадненне дзейнічае з 1994 года.
Амбудсмен спасылаецца на аналіз сітуацыі, зроблены ягоным офісам. З яго вынікае, што становішча з абаронай правоў і асноўных свабод чалавека ў Беларусі няўхільна пагаршаецца. Улады злоўжываюць інстытутамі экстрадыцыі і спрабуюць нашкодзіць палітычным апанентам.
"Практыка апошніх гадоў паказвае, што міжнароднае супрацоўніцтва з Беларуссю нясе ў сябе ўсё больш і больш рызыкі", — мяркуе Вёнцак.
Ён заклікае скасаваць двухбаковае пагадненне з Беларуссю — прынамсі ў галіне прававой дапамогі па крымінальных справах.
