У новым тэксце пра "Гарадавога" МУС узгадала пра Канстытуцыю

06/12/2018 - 06:54

Міністэрства ўнутраных спраў апублікавала чарговы тэкст, прысвечаны скульптуры гарадавога.

Апошнім часам вакол гэтай скульптуры адбываецца шмат скандальных падзеяў. Адзін з ліцэістаў даў гарадавому аплявуху, пасля чаго быў вымушаны на відэа прасіць прабачэння ў скульптуры. Потым міліцыянты забаранялі вешаць шалік на статую, цалаваць яе. За вянок з надпісам "Іміджу МУС" каля скульптуры двух чалавек аштрафавалі на значныя сумы. У інтэрнэце з'явілася петыцыя за перанос скульптуры гарадавога ў будынак музея міліцыі.

"Дзёрзкая аплявуха, флэшмоб і сумніўныя сэлфі, хуліганскія выхадкі — чаго толькі ні выпала на долю бронзавай фігуры гарадавога. Дзе ж тая грань дазволенага, пераступаючы якую чалавек становіцца правапарушальнікам?" — задаецца пытаннем прэс-служба ведамства.

Далей міліцыя выступае ў абарону гарадавога: "Сам вобраз гарадавога з'яўляецца часткай паўсядзённай гарадской культуры, увасабляе сабой узор законнасці і прыклад для пераймання. У гэтым ніколькі не сумняваюцца многія госці і жыхары сталіцы, якія штодня робяць сэлфі з бронзавым вартаўніком парадку пачатку ХХ стагоддзя. Нездаровы ажыятаж, наўмысна падаграваны сёння асобнымі грамадзянамі вакол скульптурнай групы, не мае нічога агульнага з нармальным і зразумелым жаданнем мінакоў дакрануцца да славутасці, сфатаграфаваць яе ці сфатаграфавацца разам з ёй. У рэшце рэшт, успомніць гістарычнае мінулае".

(Варта нагадаць, што сама міліцыя, якая ўзнікла ў Мінску ў сакавіку 1917 года, пачалася акурат з пераследу гарадавых, якія ўвасаблялі царскі рэжым.)

Абараняючы вулічную скульптуру, МУС нават узгадала пра Канстытуцыю Беларусі: "Спецыяльна спланаваныя акцыі і флэшмобы, правакацыі, датычныя "Мінскага гарадавога", інакш як імкненне атрымаць танны піяр разглядацца не могуць. Учынкі такога кшталту сведчаць у першую чаргу пра нявыхаванасць і невуцтва асоб, якія іх здзяйсняюць. У асобных жа выпадках яны могуць трактавацца як наўмыснае ігнараванне нормаў права. Бо абавязкам кожнага, хто знаходзіцца на тэрыторыі Рэспублікі Беларусь, з'яўляецца выкананне яе Канстытуцыі і законаў. Пры іх парушэнні вінаватая асоба прыцягваецца да адказнасці (крымінальнай, адміністрацыйнай, грамадзянска-прававой і іншай)".

Міліцыя нагадвае, што парушэнне грамадскага парадку можа кваліфікавацца як хуліганства. "Заканадаўства не змяшчае канкрэтнага пераліку хуліганскіх дзеянняў, і кожны факт ацэньваецца індывідуальна", — дадае прэс-служба МУС.