У Мінску будуць судзіць Ніну Багінскую — ёй могуць забараніць выезд з Беларусі
Ніна Багінская / Еўрарадыё
Праваабаронцам стала вядома, што зноў арыштаваныя дзве дачы актывісткі.
Сёння суд Першамайскага раёна Мінска будзе разглядаць справу актывісткі Ніны Багінскай, паведамляюць праваабаронцы. Ёй могуць забараніць выезд з Беларусі.
Што стала прычынай справы, праваабаронцы пакуль не ведаюць. "Гэта можа быць праз штрафы, нейкую крымінальную справу альбо актывістка праходзіць сведкай па справе", — адзначаюць яны.
Акрамя таго, стала вядома, што на дзве дачы Багінскай зноў накладзены арышт. Арышт быў зняты некалькі месяцаў таму, бо іх не ўдалося прадаць.
Ніна Багінская ўдзельнічае ў апазіцыйным руху яшчэ з часоў СССР — яе дзясяткі разоў затрымлівалі. У кастрычніку 2020 года Аляксандр Лукашэнка назваў Багінскую перакананым чалавекам і папрасіў сваіх чыноўнікаў "не забіраць яе з плошчаў".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.